Lejet e ndërtimit, ndryshon ligji – Gjoba 300-500 mijë lekë për lejet, ja kush përjashtohet nga taksa
Ministria e Zhvillimit Urban ka hartuar një projektligj i cili parashikon një seri ndryshimesh në rregulloren e lejeve të ndërtimit. Përmes një projektligji, Ministria e Zhvillimit Urban, propozon që nga taksa e ndikimit në infrastrukturë, mjaft e debatuar nga ana e ndërtuesve, të përjashtohen lejet për rikonstruksionin objekteve ekzistuese.
Në rast se zhvillimi përfshin njëkohësisht edhe rikonstruksion edhe ndërtim të ri, taksa e ndikimit në infrastrukturë do të aplikohet vetëm për ndërtimin e ri. Projektligji, parashikon që në rast se zhvillimi përfshin njëkohësisht edhe rikonstruksion edhe ndërtim të ri, taksa e ndikimit në infrastrukturë do të aplikohet vetëm për ndërtimin e ri.
Projektligji, i siguruar nga Televizioni SCAN, është aktualisht në fazën e konsultimit nga ana e Ministrisë së Zhvillimit Urban, ndërkohë që do të jetë Kuvendi i ri ai që do të marrë në shqyrtim dhe do vendosë miratimin e tij. Një prej neneve të projektligjit parashikon ashpërsimin e gjobave për mosrespektim të afateve të dokumentacionit për lejet nga ana e ndërtuesve. Këto gjoba do nisin nga 300 mijë lekë e do shkojnë deri 500 mijë lekë.
Nga viti 2017, Qeveria rriti taksën e ndikimit në infrastrukturë, duke e llogaritur nga 2 deri 4 për qind të vlerës së investimit. Një formulë e tillë u debatua ashpër nga ndërtuesit, sipas të cilëve, ajo rrit deri 250 euro për metër katrorë çmimet e apartamenteve për qytetarët.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.