Lejet e ndërtimit u pesëfishuan në gjysmën e dytë të vitit 2016
Dhënia e lejeve të ndërtimit ka marrë një hov në gjysmën e dytë të vitit të kaluar. Sipas të dhënave nga Instituti i Statistikave numri total i lejeve të ndërtimit të miratuara në të gjithë vendin për tremujorin e katërt ishte 147, tre herë e gjysmë më shumë krahasuar me të njëjtën periudhë të një viti më parë.
Për gjashtëmujorin e dytë të vitit, numri i lejeve të miratuara ishte 292, pesë herë më shumë krahasuar me gjysmën e dytë të vitit 2015. Statistikat tregojnë se pas heqjes së moratoriumit dhe adoptimit të sistemit të lejeve online, ka një rritje të ndjeshme të numrit të lejeve të ndërtimit.
Numri i lejeve është rritur si për ndërtimet rezidenciale, ashtu edhe për ndërtesa industriale dhe tregtare, tregues i një gjallërimi gradual të investimeve në ekonomi. Qarqet me numrin më të lartë të ndërtimeve të reja në tremujorin e katërt ishin Tirana, Elbasani, Shkodra dhe Berati.
Mbështetur në të dhënat më të detajuara nga Instat, vërehet se shumica e lejeve për ndërtimet rezidenciale janë dhënë për shtëpi deri në dy kate. Kjo dëshmon se rritja e numrit të lejeve lidhet, në një masë të madhe, me kufizimin e ndërtimeve informale.
Sipas të dhënave nga Instat, ndërtimi ka qenë ndër kontribuuesit kryesorë të rritjes ekonomike në dy vitet e fundit, por kontributi kryesor ka ardhur nga punimet inxhinierike në infrastrukturë.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.