Lëvizja e lirë e punëtorëve pas Brexit – “Britania duhet të ulë kufirin e pagës për emigrantët”
Analistët thonë se qeveria e Boris Johnson në Britani duhet të ulë kufirin e propozuar të pagës minimale prej 30,000 paund për emigrantët dhe të krijojë një shteg të ri për punëtorët e talentuar që nuk kanë ofertë pune, në mënyrë që të shmanget mungesa e punëtorëve të kualifikuar. Britania pritet të dalë nga Bashkimi Europian pas 4 ditësh dhe Qeveria ka premtuar përfundimin e lëvizjes së lirë të punëtorëve nga Europa.
Emigracioni ishte një nga çështjet kryesore gjatë referendumit të Brexit dhe Kryeministri Boris Johnson i kërkoi këshilltarëve të emigracionit që të rishikojë planin e tij, ku propozoi tavanin prej 30,000 paund. Këtë Javë, paneli i këshilltarëve rekomandoi se kufiri i pagës duhet të jetë tek 25,600 paund. Kjo do të lejojë punëdhënësit që të vazhdojnë të punësojnë emigrantët me nivelin ekzistues të pagave. Paneli i bëri gjithashtu thirrje qeverisë që të prezantojë një mënyrë për punëtorët e aftë që t’i bashkohen tregut të punës.
Qeveria pritet të rishikojë rekomandimet, përpara se të marrë një vendim dhe të prezantojë ligjin e emigracionit në muajin Mars. Fundjavën e kaluar, Sekretari i Brendshëm Priti Patel, paralajmëroi bizneset se duhet të ndryshojnë qasjen në rekrutime pas Brexit. “Bizneset kanë përfituar nga punëtorët me pak aftësi dhe kosto e lirë e punës nga Bashkimi Europian, ç’ka duhet të përfundojë”, tha ai. Ekzekutivët e bizneseve, që kanë përdorur prej dekadash lëvizjen e lirë të stafit mes Bashkimit Europian dhe Britanisë, i kanë bërë thirrje qeverisë që të ndërmarrë një qasje më fleksibël për emigracionin.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.