Lëvizja e lirë shtoi aksidentet e dëmshpërblimet – AMF: 33 milionë dollarë për periudhën janar-tetor, rritje me rreth 31.6%
Heqja e masave kufizuese për lëvizjen e mjeteve dhe të njerëzve këtë verë është përkthyer në rritje të aksidenteve, por edhe të dëmshpërblimeve të paguara nga kompanitë e sigurimeve për shkak të tyre. Autoriteti i Mbikëqyrjes Financiare raporton se dëmet e paguara bruto në sigurimin motorik për periudhën janar-tetor 2021 kapën vlerën 3,3 miliardë lekë, afërisht 33 milionë dollarë, duke pësuar një rritje me rreth 31.67% krahasuar me të njëjtën periudhë të një viti më parë.
Rritje kanë shënuar gjithashtu edhe sigurimet e mjeteve, por jo në nivelet e dëmshpërblimeve. AMF raporton se Primet e sigurimit të detyrueshëm motorik, gjatë periudhës janar-tetor 2021 arritën rreth 9,6 miliardë lekë, afërisht 96 milionë dollarë, ose 12.77 % më shumë se në periudhën janar-tetor 2020.
Produkti MTPL e brendshme, në periudhën janar-tetor 2021, pati një rritje prej 7.99% të vëllimit të primeve të shkruara bruto. Kjo u shoqërua edhe me një rritje të numrit të kontratave prej 9.72% krahasuar me të njëjtën periudhë të një viti më parë
Në total, Pagesat e dëmeve për gjithë zërat e tregut të sigurimeve gjatë periudhës janar-tetor 2021 u ulën me 9.71% krahasuar me janar-tetor 2020. Pjesa më e madhe e dëmeve të paguara bruto i përket sigurimit motorik me rreth 3,3 miliardë lekë, apo 59.61% të totalit të dëmeve të paguara bruto.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.