Lëvizjet në bursë të Warren Buffet: Rrit aksionet e “Bank of America” me 800 milionë dollarë, shet linjat ajrore
Warren Buffet shtoi këtë javë zotërimet gjigante tek Bank of America, në një kohë ku pandemia e koronavirusit vazhdon të “nxijë” perspektivën e ekonomisë amerikane dhe botërore. Një formular i Komisionit të Bursave dhe Letrave me Vlerë tregoi se konglomerati Buffet, i Berkshire Hathaway, bleu 33.9 milionë aksione të gjigantit bankar këtë javë. Kjo e ka rritur zotërimin e Berkshire te banka me 813 milionë dollarë, në mbi 24 miliardë dollarë në total.
Aksionet e bankës u rritën me rreth 1%, duke ecur kundra trendit negativ të tregut dhe duke mbiperformuar bankat e tjera të mëdha si JPMorgan, Citi dhe Wells Fargo. Berkshire ka gjithashtu aksione tek JPMorgan dhe Wells Fargo. Në muajin Maj, Buffet kishte një qasje optimiste tek takimi vjetor i Berkshire me aksionerët, që u mbajt virtualisht për shkak të pandemisë së koronavirusit. “Asgjë nuk do ta ndalojë amerikën. Magjia amerikane ka mbizotëruar gjithnjë dhe do ta bëjë përsëri”,-tha Buffet përballë aksionerëve. Megjithatë, i ashtuquajturi Orakulli i Omahas, publikoi gjithashtu se ka shitur zotërimet tek linjat ajrore për shkak të pasigurive të shkaktuara nga koronavirusi.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.