Li takon Merkel – Kërkojnë bashkëpunim mes vendeve, në sfond të pasigurive globale

Kryeministri kinez, Li Keqiang, bëri thirrje për të promovuar liberalizimin e tregtisë dhe investimeve gjatë vizitës së tij në Gjermani.

Në një periudhë të pasigurive globale dhe rritjes së proteksionizmit, Kina dhe Gjermania duhet të vazhdojnë të promovojnë liberalizimin e tregtisë dhe të mbrojnë rregullat e Organizatës Botërore të Tregtisë, tha Li Keqiang gjatë takimit me kancelaren Angela Merkel në Berlin.

Kryeministri kinez ndodhet në një takim dy-ditor në Gjermani.  Ai tha se Kina synon që dy vendet të bashkëpunojnë për të luftuar pasiguritë globale me një marrëdhënie të fortë dypalëshe, për të dërguar sinjale të stabilitetit, bashkëpunimit dhe zhvillimit drejt botës.

Duke theksuar se dy vendet gëzojnë avantazhe plotësuese ekonomike, interesa shumë të ndërthurura dhe një potencial të madh për bashkëpunim, Li tha se Kina do të përpiqet të kombinojë projektin “Made in China 2025” me strategjinë “Industry 4.0” të Gjermanisë.

Kina po përpiqet të thellojë bashkëpunimin në fusha si manifaktura, energjia, inovacioni, edukimi, turizmi si dhe mes sipërmarrjeve të vogla e të mesme të vendeve.

Duke theksuar se Gjermania është një partner i besueshëm i Kinës, Merkel tha se marrëdhëniet mes vendeve gëzojnë një vrull të fortë dhe se është e rëndësishme për t’i mbajtur kështu duke marrë parasysh situatën aktuale në botë.

Merkel e vlerësoi mbështetjen e Kinës për integrimin europian dhe i uroi kryeministrit kinez një takim produktiv me liderët e tjerë të BE-së.

Gjermania është destinacioni i parë i Li Keqiang, pasi më vonë do të takohet në Bruksel me Presidentin e Këshillit Europian, Donald Tusk dhe presidentin e komisionit, Jean-Claude Juncker.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.