Liberalizimi i tregut të energjisë, MEI: OSHEE strukturë të re që do asistojë bizneset

Ministria e Energjisë dhe Industrisë shtyu afatin për daljen në tregun e parregulluar të bizneseve të lidhura në 35 kilovolt në qershor 2017. Por për të gjithë ato biznese që hyjnë për herë të parë në këtë cikël do të ketë një proces të gjatë informimi dhe për këtë do të ngrihet edhe një strukturë e re në OSHEE.

Këshilltarja e ministrit të Energjisë dhe Industrisë, Entela Çipa jep edhe detajet në një intervistë për televizionin SCAN.

“Pranë kompanisë OSHEE do të ngrihet së shpejti një zyrë e cila do të bëjë të mundur informimin e bizneseve për këtë proces, duke siguruar modelet e kontratave, emrat e furnizuesve të mundshëm në treg, tarifat e aksesit, bursat me të cilat ata mund të njihen. Megjithatë ka edhe një proces të brendshëm. Në kuadër të liberalizimit të tregut të shumicës u janë krijuar mundësi edhe prodhuesve të pavarur, koncesionarë ose atyre që nuk kanë kontratë koncesioni dhe që operojnë në treg, të cilët mund të lidhen lirisht me ta. Ne i kemi informuar edhe për këtë mundësi që ata kanë.”

Bizneset e tjera të lidhura në 20, 10 dhe 6 kilovolt kanë vazhduar nga ana tjetër konsultimet me Ministrinë për të kuptuar si do funksionojë dalja nga tregu i rregulluar.

Gjithsesi, për këta të fundit duhet të përfundojë fillimisht instalimi i sistemit të matjes.

Nertila Maho/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.