“Libra nuk bën për Europën” – Mersch: Do të rrezikojë euron dhe vështirësojë punën e BQE!
Banka Qendrore Europiane ka paralajmëruar se kriptovaluta e Facebook mund të vështirësojë aftësinë për të caktuar politikat monetare dhe Europa duhet të injorojë premtimet e firmës. Libra, kriptovaluta e re e Facebook, një monedhë digjitale që mbështetet nga 4 valuta zyrtare dhe do jetë e disponueshme ndaj miliarda përdorues të rrjetit social, pritet të dalë në treg në vitin e ardhshëm.
Anëtari i bordit ekzekutiv i Bankës Qendrore Europiane, Yves Mersch, tha se në varësi të nivelit të pranueshmërisë së Libra dhe të referenimit të euros në shportën e valutave, kriptovaluta mund të reduktojë kontrollin e institucionit ndaj euros, vështirësojë mekanzimin e transmetimit të politikave monetare duke ndikuar pozicionin e likuiditetit të bankave në Eurozonë dhe përkeqësojë rolin ndërkombëtar të euros.
Sipas tij, Libra do të jetë e centralizuar si ç’do valutë dhe kjo do të jetë e rrezikshme për shkak se nuk mbështetet te një huadhënës që mund ta shpëtojë dhe varet nga aksionerët e vetë, që nuk janë persona me besimin e gjerë të publikut. “Valuta do dali në treg në gjysmën e parë të 2020-ës nga të njejtët persona që dorëzuan të dhënat personale në rrjetin social”, tha Mersch. Duke marrë parasysh këto sfida, autoritetet rregullatore dhe të mbikëqyrjes në Europë duhet të vlerësojnë juridiksionin e Libra dhe bashkëpunimin botëror për të zbutur rreziqet.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.