Lidhjet e paligjshme të ujit – Verifikohen 42 raste në Tiranë, shoqërohet një biznesmen

Në ditën e dytë të aksionit për lidhjet e paligjshme të ujit të pijshëm, grupet e Task-Forcës dhe stafit teknik të Ujësjellës-Kanalizimeve të Tiranës, kanë verifikuar 42 raste të dyshuara për abuzime.

Ndërkohë që, në një rast, u bë shoqërimi i një personi, i cili kishte kryer lidhje të paligjshme me rrjetin e UKT për biznesin e tij, duke sjellë jo vetëm dëmtime, por njëkohësisht edhe mosfaturim të ujit të harxhuar në biznesin që menaxhonte.

Në total, numri i verifikimeve të kryera në terren të rasteve të dyshuara për abuzime me ujin e pijshëm këto dy ditë ka arritur në 68 raste. Paralelisht, verifikimet kanë vijuar edhe në qytete të tjerë të vendit, ndërkohë që nuk janë raportuar shkelje të konstatuara.

Data 1 shkurt shënoi mbylljen e fazës së parë të aksionit, e konsideruar si periudhë vetërregullimi ku konsumatorët kishin mundësi të bënin deklarimet e lidhjeve të paligjshme dhe të nënshkruanin kontratat me shoqëritë e ujësjellës-kanalizime.

Ndërkohë që, përmes një vendimmarrjeje të dytë gjatë kësaj periudhe aksioni do të fokusohet te bizneset, pasi për konsumatorët familjarë afati i vetërregullimit u shty deri më 28 shkurt.

Reforma e ujit ka në fokus shëndoshjen financiare të këtij sektori, duke synuar përmirësimin e situatës së furnizimit me ujë.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.