Lidhjet e reja të energjisë – OSSH përplaset me ISHTI/ Inspektorati kërkon t’i certifikojë. Operatori: Bie ndesh me derregullimin
Procedurat që ndiqen për lidhjet e reja të energjisë nga qytetarët dhe bizneset kanë përplasur Operatorin e Sistemit të Shpërndarjes dhe Inspektoratin Shtetëror Teknik dhe Industrial, pranë Entit Rregullator të Energjisë. Përmes një shkrese të disa muajve më parë, ISHTI, që është institucioni përgjegjës për monitorimin e instalimeve elektrike, kërkoi që përpara vënies në shfrytëzim të një lidhjeje të re elektrike, të vendoset detyrimi për pajisjen me “deklaratën e konformitetit” nga ky dikaster.
Kjo pasi, aktualisht, në mungesë të këtij dokumenti krijohen probleme në drejtim të mirëmbajtjes, rrjetit, por edhe të sigurisë të njerëzve. Por, në një përgjigje të Operatorit të Sistemit të Shpërndarjes kjo kërkesë nuk pranohet, duke e argumentuar me reformën e derregullimit dhe lehtësimin e procedurave për qytetarët dhe sipërmarrjen në drejtim të proceduarve për pajisjen me leje, licenca dhe autorizime. Po ashtu, sipas OSSH-së shtimi i elementëve të tjerë që shoqërohen me dokumentacionin e kërkuar do të ndikojë dukshëm në zgjatjen e afateve në procedurat e lidhjeve të reja.
Në këto kushte, OSSH ka propozuar që Inspektorati Shtetëror Teknik dhe Industrial, mund të kryejë të gjitha inspektimet e nevojshme si përpara apo pas vënies në shfrytëzim të instalimeve, sipas kompetencave që i njeh ligji, pa ngatërruar këtë moment, me miratimin e pikës së lidhjes dhe përcaktimin e sistemit të matjes që është e drejtë ekskluzive e OSSH-së.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.