Ligj i ri për pakicat – Bushati: Kombësia në bazë të vetëdeklarimeve, konfirmuar nga autoritetet
Komisioni Parlamentar i Ligjeve ka miratuar me votat e të gjithë deputetëve projektligjin për pakicat kombëtare. Drafti I paraqitur nga Ministri I Punëve të Jashtme Ditmir Bushati synon te forcoje më tej elementet e identiteteve kombëtare e fetare te pakicave.
Ai parashikon që vlerësimi i numrit te pakicave ne baze te vetëdeklarimit ne censuset e popullsisë, i kombinuar me te dhënat e institucioneve të tjera, nga Ministria e Brendshme, gjendjet civile apo Prefekturat.
“Faleminderit të gjithë kolegëve të komisionit të ligjeve në Kuvend për mbështetjen në parim që i dhanë sot projekt-ligjit “Për Mbrojtjen e Pakicave Kombëtare”.
Megjithëse i premtuar që në vitin 2007, vetëm në vitin 2014 nisi puna reale pas vendimit të kryeministrit Edi Rama për të ndërtuar një proces të plotë rishikimi të kuadrit ligjor e institucional për pakicat në konsultim me ekspertizën më të specializuar ndërkombëtare dhe me përfaqësuesit e pakicave kombëtare që do të jenë përfituesit kryesorë të zbatimit të këtij ligji në praktike. Ne synojmë që ky ligj të kthehet në një praktikë të mirë evropiane në fushën e forcimit të shtetit të së drejtës dhe të mbrojtjes së të drejtave të njeriut, duke shërbyer kësisoj edhe si udhërrëfyes për vende të tjera në rajon”, shprehet Bushati.
Ligji i ri për pakicat kombëtare parashikon krijimin e një fondi të posaçëm buxhetor në funksion të tyre, ashtu si dhe aksesin e detyruar nëpër media kombëtare.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.