Ligj i ri për prokurimet publike – Tenderë me dialog e modifikim i kontratave gjatë zbatimit, ulen gjobat për shkeljet
Autortitetet kontraktore do të kenë mundësi të negociojnë paraprakisht me kompanitë pjesëmarrëse në tender si dhe të modifikojnë kontratat gjatë afatit të tyre, me një kufi të lejuar të modifikimit deri në 20% të vlerës së kontratës fillestare. Kjo është një prej risive, që parashikon ligji i ri “Për prokurimin publik”, i cili pas 8 muajsh konsultimesh është depozituar në Kuvend për disuktim. Ndër të tjera, drafti i propozuar shton disa lloje të reja të procedurave të prokurimit, ku 2 prej tyre janë procedura konkurresue me negocim dhe dialogu konkurrues. Më konkretisht, nëse ndiqet procedura e dialogut konkurrues, çdo institucioni i lind e drejta të fillojë dialogun me disa faza me pjesëmarrësit, deri në identifikimin e zgjidhjes ose zgjidhjeve, që mund të plotësojnë nevojat e tij.
Ndërkohë që, pasi të ketë deklaruar mbylljen e dialogut dhe pasi të kenë informuar pjesëmarrësit që kanë mbetur, autoriteti ose enti kontraktor i kërkon secilit prej tyre, të paraqesë ofertat përfundimtare në bazë të zgjidhjes ose zgjidhjeve të paraqitura dhe të specifikuara gjatë dialogut. Një tjetër risi e draftligjit janë edhe kontratat e rezervuara, ku autoritetet ose entet kontraktore mund t’u rezervojnë të drejtën e pjesëmarrjes në procedurat e prokurimit publik, operatorëve ekonomikë, qëllimi kryesor i të cilëve është integrimi social dhe profesional i personave me aftësi të kufizuara ose personave në nevojë, me kusht që të paktën 30 % e punonjësve të këtyre operatorëve ekonomikë ose programeve janë punëtorë me aftësi të kufizuara ose punonjës në nevojë.
Vlen të përmendet se, në dallim nga parashikimet e ligjit aktual është ulur vlera maksimale e penalizimit me gjobë, në raste të konstatimit të kundravajtjeve administrative, nga 1 000 000 lekë në 500 000 lekë. Sipas APP-së ky lehësim është bërë, duke pasur në konsideratë pagën mesatare të punonjësve, të cilët dënohen për shkelje të këtij ligji. Sipas relacionit, që shoqëron projektligjin, qëllimi i tij është përmirësimi i kuadrin rregullator të prokurimit publik në Shqipëri, duke marrë në konsideratë gjetjet dhe rekomandimet e ndryshme të organizmave ndërkombëtarë, si: Komisioni Europian, Banka Botërore, OECD/SIGMA, etj, duke lehtësuar procesin e prokurimit, si për autoritetet kontraktore, ashtu edhe për operatorët ekonomikë.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.