Ligj i ri për taksën e pasurisë – Bashkitë mungesë kapacitetesh në mbledhje, ku do ndërhyhet
Pavarësisht se metoda e re për mbledhjen e taksës së pronës ka dy vite që është vënë në zbatim, 61 bashkitë në vend nuk po arrijnë ta mbledhin atë siç duhet, pasi nuk kanë kapacitetet e duhura, duke bërë që të ketë diskriminim në pagesën e saj ndërmjet qytetarëve. Për t’iu përgjigjur kësaj problematike, qeveria ka parashikuar që ta marrë situatën në dorë duke hartuar dhe implementuar një ligji të ri, të plotë, mbi taksën pasurisë së paluajtshme në nivel vendor.
Parashikimi është bërë në planit të veprimit 2020–2022, i cili tashmë ka hyrë në fuqi. Bashkëngjitur kësaj iniciative, për të mundësuar mbledhjen e saj sipas vlerës së tregut në të gjithë vendin, mendohet kompletimi tërësor i kadastrës fiskale me të dhënat e nevojshme të qytetarëve si dhe mbështetje për ngritjen e kapaciteteve teknike e institucionale vendore për administrimin fiskal, me fokus në taksën e pasurisë dhe tarifat vendore deri në fund të vitit të ardhshëm.
Taksa mbi ndërtesat përbën zërin më të rëndësishëm të të ardhurave në buxhetet vendore, dhe në 8 muajt e parë të vitit janë mbledhur 28 milionë euro nga afro 31 milionë euro që u mblodhën në të njëjtën periudhë të 2019-ës, ndërkohë që qeveria ka parashikuar rritje të të ardhurave nga kjo taksë me 50-70 milionë euro në vit. Ndërkaq, bashkitë do të asistohen në hartimin e një manuali procedural për administrimin e taksave në nivel vendor dhe qartësimin e kornizës ligjore mbi taksat dhe tarifat vendore me qëllim fuqizimin e tyre financiar.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.