Ligji i arsimit të lartë – Nikolla: Të pamiratuara vetëm 3 VKM. UT probleme të brendshme
Problemet ne Universitetin i Tiranës janë të brendshme dhe nuk kanë lidhje me ligjin e arsimit të lartë. Kjo ka qenë përgjigja e ministres së Arsimit Rinisë dhe Sportit Lindita Nikolla në interpelancën e thirrur nga deputetët e Lëvizjes Socialiste për integrim në seancën parlamentare të kësaj të enjteje.
Nikolla siguroi zgjidhjen e shpejtë të kaosit të krijuar në këtë institucion i cili kohët e fundit ka qenë në qendër të debatit për shkak të vonesës së pagave të pedagogëve .
“Janë vetëm 3 VKM pa miratuar nga aktet nënligjore të cilat përmbyllen brenda shkurtit. Janë realizuar 100 % e udhëzimeve të ministrit. Janë miratuar në masën 100 % urdhra të ministrit, rregullores ministrit, si dhe urdhrat e kryeministrit. Asnjë universitet publik sot nuk është në kaos prej ligjit të ri të arsimit të lartë. Dëshira për t’i veshur sistemit disa problematika të Universitetit të Tiranës është krejt e pavend. Problemet që has sot Universiteti i Tiranës janë problem të brendshme të cilat do të zgjidhen shumë shpejt me përfshirjen e të gjitha aktorëve të atij universiteti”, shprehet Nikolla.
Deputetja e LSI, Kejdi Mehmetaj, akuzoi ministren për shkeljen e ligjit në 5 nene, duke shtuar se mungesa e zbatimit të tij, ka rritur kostot financiare të familjeve shqiptare.
“Ministria është përgjegjëse e drejtpërdrejtë që mijëra studentë shqiptarë nuk patën mundësi që të ndiqnin jo thjesht ëndrrën e tyre për arsimin e lartë por meritën e tyre për këtë arsim. Dhe më vjen keq që e dëgjoj këtu që paska ndodhur një proces shumë i mirë kur në fakt kemi qenë në zyrën tuaj, edhe në zyrën e Parlamentit kur kemi thënë që ky proces po shkonte jashtëzakonisht shumë keq por ju refuzonit publikisht të hiqnit dorë apo të thonit se kishit gabuar dhe prandaj e vazhduat gabimin tuaj duke rënduar akoma më shumë jetën e studentëve”, tha ajo.
Ndërkohë data 10 mars është caktuar nga ministria e Arsimit, si afati për ti dhënë përgjigje shqetësimeve të ngritura nga pedagoget e universitetit të Tiranës, të cilët një ditë më parë zhvilluan një takim me ministren Lindita Nikolla.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.