Ligji i ri për “blerjet e së dielës” – Greva në Athinë e Selanik
Trafiku ka qenë i limituar në rrugët kryesore të Athinës, pavarësisht uljeve të mëdha nëpër dyqane. Si në kryeqytet, ashtu edhe në qytetet e tjera të vendit, punonjësit e dyqaneve hynë në grevë dhe protestuan jashtë rrjeteve të markave ndërkombëtare.
Protestat bëhen në kundërshtim të masës së re të imponuar nga qeveria, ku dyqanet duhet të rrinë hapur për 32 të diela në vit, nga Maji në Tetor, çka supozohet t’i vijë në ndihmë turizmit.
“Këto masa nuk e ndihmojnë as turizmin dhe as zhvillimin e bizneseve të vogla e të mesme. Në të kundërt, ato do të shtojnë vendosjen e dryneve në këto dyqane, duke i dërguar punonjësit drejt papunësisë”, thotë Panagiotis Kyriakoula sekretari i Federatës greke të Punonjësve Privatë.
Ai deklaroi se shumë nga dyqanet ishin të mbyllura prej mungesës së publikut dhe blerësve. Shumica e vizitorëve të huaj u drejtohen dyqane ushqimore dhe tregut të rrobave të përdorura në Monastiraki.
Në Selanik, punonjësit e dyqaneve u ndaluan në mëngjes të futeshin në dy supermarkete, megjithatë, shumica e dyqaneve në qendër të qytetit qëndruan hapur.
Ligji i ri që detyron hapjen e dyqaneve për gjashtë muaj të vitit në zona specifike të vendit është një detyrim i programit të shpëtimit për Greqinë. Vendimi i Ministrisë së Ekonomisë përcakton se dyqanet që duhen hapur edhe ditën e diel janë:
- Ato pranë aeroporteve ndërkombëtarë të Athinës dhe Selanikut
- Ato pranë porteve të Athinës e Selanikut ku kroçieret dhe anijet e pasagjerëve ankorohen
- Ato pranë porteve të jahteve
Gjithashtu, në përzgjedhje, rol kryesor kishte edhe përqindja e dhomave të zëna në hotelet pranë, përqendrimi i bizneseve pranë hoteleve, si edhe afërsia me pikat e nxehta turistike me vlera historike dhe kulturore.
Faktorë tjetër ishte edhe përqendrimi i aktivitetit tregtar, përcaktuar nga numri i degëve të një dyqani, fitimi dhe kërkesa konsumatore.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.