Ligji për funksionimin e Gjykatave Administrative. Rastet kur vendimet e shpallura mund të ankimohen me rekurs
Ligji “Për organizimin dhe funksionimin e gjykatave administrative dhe gjykimin e mosmarrëveshjeve administrative”, i cili është botuar këtë të premte në fletoren zyrtare ka marrë disa shtesa dhe ndryshime. Ndryshim ka pësuar neni 58 për shkaqet e rekursit.
Vendimet e shpallura nga Gjykata Administrative e Apelit në rastet që parashikohen në këtë ligj, mund të ankimohen me rekurs në Gjykatën e Lartë në këto raste:
a) për zbatim të gabuar të ligjit material ose procedural, të një rëndësie themelore për njehsimin, sigurinë dhe/ose zhvillimin e praktikës gjyqësore;
b) kur vendimi i ankimuar është i ndryshëm nga praktika e Kolegjit Administrativ ose e Kolegjeve të Bashkuara të Gjykatës së Lartë;
c) ka shkelje të rënda të normave procedurale, me pasojë pavlefshmërinë e vendimit ose të procedurës së gjykimit.”.
Gjykata ka të drejtë të vendos në dhomë këshillimi mospranimin e rekursit, në rastet kur është bërë për shkaqe që nuk parashikohen në nenin e mësipërm.
Në nenin 9 të ligjit parashikohet që “Ndihmësit ligjorë, përfshirë ndihmësit ligjorë të gjykatave administrative të shkallës së parë, do të qëndrojnë në detyrë, në përputhje me nenin 165 të ligjit për statusin e gjyqtarëve dhe prokurorëve në Republikën e Shqipërisë”.
Ndërsa në lidhje me mosmarrëveshjet mbi marrëdhëniet e punës të punonjësve në administratën publike, në gjykatë ose prokurori, në nenin 11 parashikohet që “marrëdhënia e punës e të cilëve bazohet në Kodin e Punës, që ditën e hyrjes në fuqi të këtij ligji janë në gjykim në gjykatat administrative, do të vazhdojnë të gjykohen sipas dispozitave të ligjit në fuqi, përpara hyrjes në fuqi të këtij ligji”. Ky ligj hyn në fuqi 15 ditë pas botimit në Fletoren Zyrtare. Miratuar në datën 30.3.2017.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.