Linjat ajrore, drejt rimëkëmbjes gjatë Verës – EasyJet sheh një goditje afatshkurtër përpara fuqizimit në muajt e turizmit

Linja ajrore britanike easyJet deklaroi se varianti Omicron i Covid-19 po ndikon tek performanca e këtij tremujori, por pret që të shohë një kërkesë të fortë për fluturime këtë Verë, kur kapaciteti të rikthehet pranë niveleve të para-pandemisë.  Kompania deklaroi se ka fluturuar në 64% të kapacitetit të para pandemisë në tremujorin e parë fiskal, por Omicron goditi kërkesën e konsumatorëve në Dhjetor.  Ekzekutivi Johan Lundgren, tha se prenotimet në Britani janë rritur më herët gjatë muajit, kur u reduktuan kufizimet në udhëtime dhe u fuqizuan më tej kur qeveria deklaroi se kërkesat e testimeve do të përfundojnë në muajin e ardhshëm.

“Shohim një Verë të fortë përpara, me kërkesën e fuqizuar që do të kthejë easyJet në nivelet e vitit 2019”- tha ai.  Linjat ajrore në botë kanë parashikuar një rimëkëmbje në Pranëverë dhe Verë të këtij viti, me rivalin europian Wizz Air që bëri të njejtin projeksion më herët gjatë Javës.  Linja ajrore theksoi se ka patur rreth 67% të kapacitetit të parapandemisë në shitje për tremujorin aktual, me nivelin që është rritur nga rreth 50% në Janar. Për Nëntorin, përpara se ndikimi i Omicron të ishte i dukshëm, easyJet parashikoi se kapaciteti në tremujorin e parë do të ishte rreth 70% i niveleve të para-pandemisë.  Të ardhurat totale për tremujorin e parë fiskal u rritën në 805 milionë paund apo 1.08 miliardë dollarë, në rritje nga 165 milionë paund një vit më parë.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.