Liqeni toksik vullkanik zbulon se jeta në Marsin e lashtë ishte krejtësisht e mundur!
Pranë majës së vullkanit Poás të Kosta Rikës është një nga liqenet më acid në Tokë, ngjyrë blu e ndezur dhe plot me metale toksike. Kushtet e vështira të Laguna Caliente, ku temperaturat mund të luhaten midis 38-90 gradë Celsius, janë vendi ku disa shkencëtarë me fat shkojnë për të mësuar më shumë rreth Marsit.
Shpërthimet e shpeshta freatike ndodhin kur ujërat nëntokësore nxehen nga aktiviteti vullkanik, duke lëshuar shpërthime hiri, shkëmbi dhe avulli.
Megjithatë, mikrobet kanë gjetur një mënyrë për të jetuar në këtë mjedis, një nga më armiqësorët në planetin tonë, sipas studimeve të shumta të liqenit dhe kërkimeve të reja të publikuara javën e kaluar në Frontiers in Astronomy and Space Science. Edhe pse diversiteti i jetës në këtë liqen nuk është i lartë, ai ka arritur të përshtatet dhe të vazhdojë në shumë mënyra.
“Zbulimi ynë tregon se jeta vazhdon në mjediset më ekstreme në Tokë,” tha autori i studimit Justin Wang, student i diplomuar dhe asistent kërkimor në Universitetin e Kolorados Boulder. “Është e vështirë të imagjinohet diçka më armiqësore ndaj jetës sesa një liqen vullkanik ultra-acid me shpërthime të shpeshta”, tha Wang. “Biodiversiteti i ulët i shoqëruar me përshtatjet dhe metabolizmin e shumtë në kampionin tonë sugjeron që liqeni pret mikrobe shumë të specializuara për këtë lloj mjedisi.”
Ky mjedis i botës tjetër mund të sugjerojë se si jeta mund të ketë ekzistuar në Mars miliarda vjet më parë dhe të zbulojë vende të reja për të kërkuar prova të jetës së lashtë në planetin e kuq, sipas studiuesve. CNN
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.