Lira bie në nivel rekord të ulët / Humbet 15% pasi Erdogan shkarkon përsëri shefin e bankës qendrore
Lira turke ra me 15% pranë nivelit më të ulët të të gjitha kohërave në nisje të javës, pas vendimit të papritur të presidentit Erdogan në fundjavë, ku largoi guvernatorin e bankës qendrore.
Emërimi i Sahap Kavcioglu, ish bankier dhe anëtar i partisë qeverisëse, shënoi herën e tretë që prej mesit të vitit 2019 që Erdogan ndërron papritmas kryetarin e bankës qendrore. Kavcioglu u përpoq të zbusë shqetësimet mbi shitjet nën panik të aseteve turke dhe të ndryshojë qasjen drejt politikave lehtësuese, duke i thënë ekzekutivëve të bankave dytësore se kërkon të ndërrojë menjëherë politikat.
Lira ra drejt 8.4850 kundër dollarit, nga 7.2185 që ishte në tregtinë e ditës së Premte. Valuta rikuperoi gjysmën e këtyre humbjeve pasi ministri i Financave Lutfi Elvan, tha se Turqia do të respektojë rregullat e tregut të lirë.
Erdogan pushoi Naci Agbal 2 ditë pas një rritjeje të madhe të interesave që synonte të frenonte inflacionin prej 16% dhe rënien e lirës. Me vetëm 5 muaj në detyrë, Agbal ka rritur interesat me 875 pikë bazë në 19%.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.