Liritë njerëzore, jemi të parët në rajon – Indeksi global i Fraser, Shqipëria e 26-ta ndër 162 shtete për lirinë ekonomike
Instituti Fraser në bashkëpunim me atë CATO, kanë publikuar indeksin më të fundit të lirive njerëzore, ku përfshihen ato personale, ato civile si dhe liria ekonomike. Në indeksin e këtij viti, Shqipëria renditet e 43-ta në botë, ndër 162 shtete, duke fituar vetëm një pozicion krahasuar me vitin paraardhës, si dhe duke u pozicionuar e para në rajon.
Veç vendeve të rajonit, Shqipëria lë pas në këtë renditje edhe vende si Greqia, Polonia, Izraeli, etj. Rezultatin më të mirë, vendi ynë e regjistron në drejtim të lirive ekonomike, ku renditet në vendin e 26-të në botë, ndër 162 ekonomi. Madje, ndër vite përmirësimi në këtë drejtim është i ndjeshëm, thekson raporti, duke prekur tanimë rekordin më të lartë historik.
Në analizë merren shumë indikatorë, si: sundimi i ligjit, siguria, liria e lëvizjes, besimi, shoqëria civile, liria e shprehjes dhe e informimit, sistemi ligjor, të drejtat e pronës, madhësia e qeverisë, aksesi në financim, tregti ndërkombëtare, etj, etj. Të dhënat në indeksin e këtij viti i referohen vitit 2018. Në nivel global, në vend të parë qëndron Zelanda e Re e ndjekur nga Zvicra dhe Hong Kongu, ndërkohë që në vend të fundit renditet Siria.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.