Listës së debitorëve në tatime i shtohen edhe 691 biznese! 533 prej tyre vetëm në periudhën 5 janar-10 shkurt 2017

Drejtoria e Përgjithshme e Tatimeve ka përditësuar listën bizneseve debitore. Referuar listës së përditësuar me datën 10 shkurt, rezulton se në total janë 20 mijë e 525 biznese në “listën e zezë”.Përditësimi i mëparshëm ishte bërë deri në mesin e muajit dhjetor, ku rezultonte se në listë ishin 19 mijë e 834 biznese.

Kjo nënkupton se nga mesi i muajit dhjetor 2016 deri me datën 10 shkurt 2017, listës i janë bashkëngjitur edhe 691 biznese të reja, raporton “SCAN”. Nëse analizojmë listën zyrtare të Tatimeve, rezulton se vetëm në periudhën 5 janar 2017-10 shkurt 2017, janë 533 biznese që janë përfshirë në këtë listë.  Në këtë listë zyrtare janë të përfshira bizneset që kanë detyrime që prej vitit 2009.

Ndërkohë në Kuvend është depozituar tashmë nisma e qeverisë që fal detyrimet e prapambetura si dhe disa gjoba e kamatëvonesa, çka mund të sjellë “shfryrjen” e kësaj liste, kryesisht nga borxhet që datojnë para vitit 2010.

Në kuadër të kësaj nisme, qeveria shqiptare ka përllogaritur se sa është masa e borxhit që individët dhe bizneset i detyrohet organeve doganore e tatimore. “Referuar të dhënave zyrtare të Ministrisë së Financave, borxhi tatimor e doganor rezulton në vlerë 172.50 miliard lekë”.  Ndërkohë, borxhi në tatime është përllogaritur për periudhën 2000-2016 e rezulton në vlerë 24.8 miliard lekë.  Në rast se amnistia arrin rezultatin e pritshëm, ajo parashikon të fshijë potencialisht 90.97 miliard lekë detyrime të papaguara ku përfshihen jo vetëm detyrimet tatimore e doganore por edhe detyrime të tjera.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.