Llogaridhënia e qeverisë, Rama: Këtë muaj hapim kantierin për “Rrugën e Arbrit”, projektet infrastrukturore për Lezhën
Brenda muajit maj do të hapet kantieri i ndërtimit të Rrugës së Arbrit, deklaroi kryeministri Rama nga qyteti i Lezhës, gjatë turit të llogaridhënies së qeverisë.
“Brenda majit do të hapim kantierin e Rrugës së Arbrit dhe do të fillojë e nuk do të ndalet më puna deri sa të përfundojë përfundimisht. Ky aks do ta bëjë Dibrën zonë të integruar me kryeqytetin dhe do të çelë potencial shumë të madh për të gjithë atë krah, që lidh Tiranën me Dibrën dhe ka bukuri përrallore të paprekura dhe që shumëkush nuk i ka parë dot për shkak të mungesës së rrugës”.
Gjithashtu pjesë e investimeve infrastrukturore janë dy projekte që do ti japin zhvillim zonës, rruga Shëngjin –Velipojë dhe autostrada Milot-Balldren.
“Rruga strategjike Shëngjin-Velipojë, një nga akset prioritare te qeverisë.do ti hapë rrugë zhvillimit të turizmit. Kjo rrugë është strategjike dhe do ti shërbeje edhe turistëve nga Mali i Zi. Aksi rrugor Milot-Balldren do të nis punimet në shtator, ky projekt do ti japë fund një historie të pabesueshme, ku rruga nacionale kalon te një kthesë qorre”.
Kryeministri tha se në ditët në vijim qeveria do të miratojë një paketë të veçantë fokusuar te agroturizmi.
“Në ditët në vijim qeveria do të miratojë edhe në paketë të veçantë mbështetje duke krijuar lehtësira të ndjeshme fiskalë për agroturizmin, duke nxitur investimet, me garancinë se kontributet në sistemin tonë të taksave do të jenë shumë të ulta sa janë sot. Agroturizmi është potencial i madh për zonat ku duket sikur bujqësia apo zhvillimi i fermave dhe blegtorisë në funksion të tregut mbetet sfidë e vështirë, po ku natyra është e mrekullueshme. Agroturizmi është instrument shumë efikas, si një mënyrë jo vetëm për të dal nga varfëria, por edhe për të bërë një biznes fitimprurës. Përmes kësaj pakete mbështetjeje, ku do kemi ulje të TVSH, si për hotelet me 4 e 5 yje, me 6%, t’i japim mundësi fantazisë dhe vullnetit të sipërmarrësve për të krijuar modelet e para. Mjafton të kesh një banesë në një natyrë të bukur, të ngresh një mikrofermë në funksion të agroturizmit, për të krijuar një biznes shumë fitimprurës. Sa i përket listës së 100 fshatrave që do të mbështeten, 5 prej tyre janë në këtë qark”.
E.Z/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.