Llogaritë me e-banking janë rritur me 37% gjatë vitit 2016
Shërbimi i bankingut përmes internetit ka marrë një hov të ndjeshëm gjatë vitit të kaluar. Sipas Bankës së Shqipërisë, numri i llogarive bankare të lidhura me internetin ka arritur në 209 mijë, në rritje me 37% krahasuar me vitin 2015.
Viti i kaluar ka rezultuar pozitiv në zgjerimin e përdorimit të këtij shërbimi, pas një rritjeje mjaft modeste në vitin paraardhës.
Në vitet e fundit, Shqipëria po ngushton prapambetjen për sa i takon përdorimit të internetit dhe teknologjive, çka ka shtruar terrenin edhe për shfrytëzimin e tyre në funksion të shërbimeve financiare.
Shërbimet e bankingut përmes internetit ofrohen tashmë nga pjesa më e madhe e bankave dhe kostot e përdorimit janë minimale, çka duket se ka ndihmuar në rritjen e numrit të përdoruesve.
Përllogaritet se afërsisht 6% e gjithë llogarive në sistemin bankar shqiptar mund të aksesohen përmes internetit, ndërsa një vit më parë ky raport ishte 4.6%.
Përparimet e Shqipërisë ngelen të konsiderueshme, po të kemi parasysh edhe prapambetjen e trashëguar në përdorimin bazë të shërbimeve financiare. Afërsisht një dekadë më parë, vetëm një pakicë e shqiptarëve kishin një llogari bankare, ndërsa vitet e fundit rritja është e dukshme.
Tashmë, numri i llogarive bankare ka arritur në 3.44 milionë, duke tejkaluar kështu numrin e popullsisë së vendit. Vetëm numri i llogarive të individëve rezidentë në Shqipëri është 3.2 milionë, ose mesatarisht 1.11 llogari bankare për banorë.
Shqipëria po afrohet në nivelet rajonale të përdorimit të shërbimeve bankare. Për Rajonin tonë, mesatarja është 1.3 llogari për banorë, ndërkohë që në vendet e Bashkimit Europian kjo shifër arrin në 2.3.
Ersuin Shehu/RTV SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.