Londra përballë Brexit – Shërbimet financiare do të qëndrojnë prioritet kombëtar pas daljes
Shërbimet financiare do të qëndrojnë prioritet për ekonominë britanike pas Brexit dhe nuk synohet ndryshimi i rregullave që të rrisë konkurrencën si qendër financiare. “Shërbimet financiare do të qëndrojnë një prioritet kombëtar”, tha Sekretari ekonomik i Thesarit, John Glen.
Britania, që është qendra më e madhe financiare e Bashkimit Europian, del nga unioni në Mars të 2019-ës, duke shtuar dyshimet mbi aftësinë e bankave, kompanive të sigurimit dhe manaxherët e portofolit për t’i shërbyer klientëve europianë.
Disa politikanë mbështetës të Brexit kanë thënë se nëse Britania nuk arrin një marrëveshje të mirë tregtare me Bashkimin Europian, atëherë duhet të lehtësojë rregullat bankare në mënyrë që qendra financiare e Londrës të ruajë epërsinë në rang global.
“Ne nuk synojmë ndryshimin e rregullave pas Brexit”, tha John Glen, që është përgjegjës për industrinë e shërbimeve financiare. Britania u desh të shpëtojë bankat gjatë krizës financiare të vitit 2008 dhe ai tha se rregullat e ashpra të prezantuara që prej atëherë kanë patur mbështetje nga e gjithë bota.
Sipas tij, Britania nuk duhet të harrojë që qëllimi kryesor i rregullimit është mbrojtja e stabilitetit financiar dhe taksapaguesve nga mundësia e dështimeve.
Bankat, kompanitë e sigurimeve dhe manaxhuesit e aktiveve në Britani, po zhvendosin disa prej aktiviteteve dhe stafin në qendra të tjera financiare brenda Bashkimit Europian, për t’u siguruar në rast të një daljeje pa marrëveshje.
Glen tha se nuk është në interes të Britanisë dhe as Bashkimit Europian që të përjashtojnë shërbimet financiare nga marrëdhënia e ardhshme që do të kenë.
Deri më tani, Brukseli ka treguar se shërbimet financiare në Britani do të përballen me të njëjtin kufizim si vendet e tjera jashtë unionit, si SHBA dhe Singapori.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.