Londra rimerr kurorën si qendër e tregtimit – Lë pas Amsterdamin, pavarësisht se është ende poshtë nivelit para Brexit
Londra ka lënë pas Amsterdamin duke u bërë përsëri qendra me tregtimin më të madh të aksioneve në Europë gjatë Qershorit dhe marrë vendin kryesor për të parën herë këtë vit, pasi Brexit zhvendosi pjesën më të madhe të volumit në kontinent. Mesatarisht 8.92 miliardë euro aksione në ditë janë tregtuar në qendrat e Londrës në Qershor, krahasuar me 8.8 miliardë euro në Amsterdam.
Kjo vjen në rënie për Amsterdamin nga 9.4 miliardë euro në ditë mesatarisht për Majin dhe në rritje nga 8.7 miliardë euro për Londrën. Parisi, qendra e tretë më e madhe financiare, pati një rënie të volumit të tregtimit nga rreth 6.1 miliardë euro në Maj, në 5.8 miliardë në Qershor. Edhe pse rikthimi i Londrës në vendin kryesor përbën një fuqizim për sektorin e tregtimit të aksioneve, të goditur nga Brexit, avantazhi i qytetit ndaj Amsterdamit është vetëm një fraksion i asaj që ka qenë përpara periudhës së tranzicionit.
Në dhjetor , volumi i tregtimit të aksioneve në Londër ishte 14.3 miliardë euro, krahasuar me 2.2 miliardë euro për Amsterdamin, sipas të dhënave të Cboe Europë. Britania humbi të drejtat për të aksesuar tregun e përbashkët Europian më 31 Dhjetor dhe blloku nuk ka lejuar investitorë brenda kufijve që të tregtojnë aksione në kompani si Airbus dhe BNP Paribas nga Mbretëria e Bashkuar. BE mund të rihapë aksesin me kalimin e kohës duke njohur tregjet britanike si ekuivalente me të vetat, edhe pse ka pak shenja të progresit në këtë proves.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.