Lufta tregtare te Bankat Qendrore – Banka e Kinës pritet të ulë 2 herë interesat. Fed mund të ndjekë
Banka Qendrore e Kinës pritet të ulë normën bazë të interesit dy herë gjatë këtij viti dhe një herë në 2020-ën, prej luftës tregtare me Shtetet e Bashkuara. SHBA deri më tani ka vendosur tarifa në 25% të 250 miliardë dollarë mallrave kinezë dhe presidenti Donald Trump, ka kërcënuar të njejtën barrë tatimore për pjesën tjetër të mbetur të importeve nga Kina.
Në kundërpërgjigje, Pekini ka rritur gjithashtu tarifat ndaj miliarda dollarë produkte nga Amerika. Sipas analistëve të Bank of America Merrill Lynch, tarifat e radhës prej 25% ndaj 200 miliardë dollarë mallrave kinezë do të jenë më të dëmshme ndaj rritjes ekonomike. Banka pret që Rezerva Federale në Shtetet e Bashkuara të ulë normën bazë të interesit në Shtator dhe Dhjetor të këtij viti. Nëse lufta tregtare ashpërsohet, kjo mund të bëjë që Banka Qendrore e Kinës të ulë normën e rezervave të detyrueshme këtë vit më shumë se 2 herë.
Megjithatë, projeksionet nuk përjashtonin shanset që Washingtoni dhe Pekini të arrijnë në një dakordësi më vonë gjatë vitit. Tek politikat fiskale, Kina pritet të prezantojë gjithashtu masa të reja të investimeve në infrastrukturë, subvencioneve konsumatore dhe ulje tatimore, për të mbështetur ekonominë.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.