Lukashenko kërcënon të ndërpresë furnizimin me gaz nëse BE vendos më shumë sanksione!
Alexander Lukashenko ka ngritur mundësinë e ndërprerjes së furnizimit me gaz për Bashkimin Europian nëse Brukseli vendos sanksione të reja kundër regjimit të tij lidhur me fluksin e emigrantëve në kufirin perëndimor të vendit.
Mijëra njerëz mbeten të ngecur në kushte të ashpra në kufirin Bjelloruso-Polak në mes të përplasjes midis Minskut dhe BE-së, e cila akuzon Bjellorusinë për orkestrimin e qëllimshëm të krizës.
Anëtarët perëndimorë të Këshillit të Sigurimit të Kombeve të Bashkuara dënuan Bjellorusinë për “instrumentalizimin e emigrantëve” pas një sesioni urgjent mbi krizën të enjten.
Udhëheqësi bjellorus shprehu mundësinë e ndërprerjes së tubacionit Yamal-Europë, i cili kalon Bjellorusinë nga Rusia për të furnizuar me gaz vendet e BE-së, Gjermanisë dhe Polonisë në veçanti.
“Ne e ngrohim Europën dhe ata po kërcënojnë të mbyllin kufirin. Dhe çfarë do të ndodhte nëse e ndërpresim gazin natyror që shkon atje? Prandaj unë do t’i këshilloja liderët polakë, lituaniez dhe liderë të tjerë mendjelehtë të mendojnë përpara se të flasin,” tha Lukashenko.
Toni i tij ishte më i ashpër se ai i ministrit të Jashtëm Vladimir Makeï, i cili pak më parë bëri thirrje për dialog me BE-në, duke pretenduar se Minsk ishte në favor të zgjidhjes së çështjes “sa më shpejt të jetë e mundur”.
Gazsjellësi Yamal-Europë i lejon gjigantit rus Gazprom të furnizojë sasi të konsiderueshme gazi nga Gadishulli Yamal në Artik, në Poloni dhe Gjermani. Në këmbim, Minsk merr tarifat e tranzitit.
Duke folur nga Berlini, liderja e opozitës bjelloruse Sviatlana Tsikhanouskaya e hodhi poshtë kërcënimin e Lukashenkos si një “blof”, duke thënë se ndërprerja e furnizimit me gaz do t’i shkaktonte “më shumë dëm atij, Bjellorusisë, sesa Bashkimit Europian”.
“Nuk do ta merrja seriozisht (kërcënimin), sepse edhe Rusia ka një interes në këtë çështje”, tha ajo.
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.