Lulëzon agroturizmi, trefishohen subjektet e reja të hapura në 2018
Fushata e qeverisë për nxitjen e bizneseve të agroturizmit duket se ka pasur sukses, bazuar në të dhënat për vitin aktual. Sipas statistikave të Qendrës Kombëtare të Licencimit, deri më tani janë hapur 43 struktura të reja agroturizmi në të gjithë vendin.
Kjo shifër përbën një trefishim krahasuar me një vit më parë dhe përbën një numër më të madh se tre vitet e mëparshme të mbledhura së bashku.
Ndikimi kryesor për këtë lulëzim të këtij lloji aktiviteti janë mbështetja përmes skemave dhe lehtësive fiskale të miratuara së fundmi. Këto përfshijnë fondin prej 2.5 milionë eurosh për zhvillimin rural dhe diversifikimin ekonomik, TVSH e ulur për strukturat akomoduese në 6%, tatim fitimi në vetëm 5%, si dhe taksa e ndikimit në infrastrukturë zero.
Ministria e Bujqësisë dhe Zhvillimit Rural i ka vlerësuar këto statistika, duke e quajtur agroturizmin një mundësi për të shtuar vlerën e prodhimit bujqësor, punësimin dhe mirëqenien në fshat.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.