“Lumë investimesh” ruse në Serbi – Putin, vizitë zyrtare në Beograd, diskutohet edhe për Kosovën
Presidenti i Rusisë, Vladimir Putin, zhvilloi një vizitë 1-ditore në Beograd, ku u takua me homologun e tij serb, Aleksandër Vuçiç. Që kur erdhi në pushtet në vitin 2012, Vuçiç është përpjekur të mbajë një balancë delikate mes ambicieve të vendit për tu bërë pjesë e Bashkimit Europian dhe ruajtjes së marrëdhënieve me partnerin më të madh tregtar dhe historik, Rusinë. Gjatë konferencës të përbashkët për mediat, Vuçiç tha se është i kënaqur me numrin e madh të marrëveshjeve të nënshkruara mes Serbisë dhe Rusisë.
“Jemi shumë të kënaqur me bashkëpunimin tonë në të gjitha fushat. Sot, ne nënshkruan edhe shumë marrëveshje të tjera, thuajse në të gjitha sferat. Marrëdhëniet tona ekonomike po përmirësohen shumë. Në energji, Serbia është plotësisht e varur nga Rusia. Për këtë arsye, arritëm marrëveshje për rritjen e kapacitetit të magazinimit të gazit. Diskutuam edhe për bashkëpunimin në infrastrukturë, sidomos në hekurudha, pasi besojmë se do jetë e ardhmja e transportit. Të gjitha këto kontrata kanë një vlerë prej rreth 230 milionë euro”.
Gjithashtu, Vuçiç kërkoi ndihmën e Rusisë për të arritur një marrëveshje mes Serbisë dhe Kosovës, që është kushti kryesor për të dyja vendet në progresin drejt Bashkimit Europian. Kësaj thirrje, presidenti rus, Vladimir Putin, ju përgjigj pozitivisht, duke thënë se Rusia mbështet palët në arritjen e një marrëveshje, por bazuar në rezolutën 1244 të Këshillit të Sigurimit të Kombeve të Bashkuara.
“Rusia, ashtu si Serbia, është e interesuar për një Ballkan të qendrueshëm dhe të sigurtë. Qendrimi i Rusisë për Kosovën është i njohur tashmë. Ne jemi në favor të zgjidhje të favorshme, sipas rezolutës së Kombeve të Bashkuara. Për fat të keq, autoritetet në Kosovë, së fundmi kanë ndërmarrë hapa provokativë, si krijimi i Ushtrisë së Kosovës apo vendosja e tarifave ndaj produkteve serbe”.
Gjatë vizitës së tij në Beograd, Putin e dekoroi presidentin e Serbisë me urdhrin e “Alexander Nevsky”, dekorata e pestë më e rëndësishme e vendit. Në këtë mënyrë, Vuçiç bëhet lideri i parë jashtë ish-Bashkimit Sovjetik që merr një dekoratë të tillë.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.