LVV, humbësja e madhe në zgjedhje – Kosovë, partitë e opozitës kanë fituar shumicën në raundin e dytë
Më 14 nëntor, në 21 komuna të Kosovës u mbajt rundi i dytë i zgjedhjeve lokale, pas atij të parit më 17 tetor. Lëvizja Vetëvendosje ka pësuar një humbje të thellë në raundin e dytë të zgjedhjeve lokale që u zhvilluan të dielën në Kosovë, duke fituar vetëm 4 nga 12 komunat ku kishte kandidatë. Lëvizja Vetëvendosje, që në zgjedhjet parlamentare të shkurtit fitoi mbi 50 për qind të votave, në rundin e parë të zgjedhjeve lokale nuk arriti të fitojë asnjë komunë. Në rundin e balotazhit, partia e kryeministrit Albin Kurti fitoi në komunat Gjilan, Podujevë, Kamenicë dhe në Shtime.
Partia Demokratike e Kosovës (PDK) në rundin e balotazhit ka fituar në pesë komuna. PDK-ja arriti fitore në Prizren, Vushtrri, Dragash, Drenas dhe Kaçanik.
Duke llogaritur edhe rundin e parë të zgjedhjeve, PDK-ja ka fituar në nëntë komuna. Vetëm Lista Serbe ka më shumë komuna të fituar, gjithsej dhjetë.
Aleanca për Ardhmërinë e Kosovës (AAK), ka fituar tre komuna në garën e balotazhit, Gjakovë, Rahovec dhe Klinë.
Lidhja Demokratike e Kosovës (LDK), ka fituar gjithsej shtatë komuna, dy në raundin e parë dhe pesë në raundin e dytë të zgjedhjeve lokale. Përveç Prishtinës, kjo parti ka fituar në Fushë Kosovë, Viti, Junik dhe Istog në rundin e balotazhit.
Fitoren më të madhe kjo parti e ka regjistruar në kryeqytetin Prishtinë, ku Përparim Rama, i cili me 1,700 vota më shumë ka mposhtur kandidatin e Lëvizjes Vetëvendosje, ish-ministrin e Shëndetësisë, Arben Vitia.
Por, kush është kryebashkiaku i ri i Prishtinës?
Nga refugjat në Britani te projektet e famshme arkitekturore .
Përparim Rama është konfirmuar zyrtarisht si fitues i garës për bashkinë më të madhe të Kosovës, Prishtinës. Ai ka lindur në Prishtinë me 20 janar të vitit 1976 dhe në moshën 16 vjeçare është shpërngulur në Britaninë e Madhe si refugjat duke kërkuar azil.
Atje ai studio për arkitekturë, fushë në të cilën arriti të bëhet i njohur. Media të rëndësishme botërore si Bloomberg, BBC apo CNN i kanë kushtuar vëmendje punës dhe jetës së tij.
Aktiviteti i tij profesional ka qenë në Britaninë e Madhe, Shtetet e Bashkuara të Amerikës, Çeki si dhe në Shqipëri.
Në vitin 2012, ai përfaqësoi për herë të parë Kosovën në Bienalen e Venecias me veprën e emërtuar “Punuesi i filigranit”. I paangazhuar në strukturat politike, Rama pranoi ftesën e kreut të Lidhjes Demokratike të Kosovës Lumir Abdixhiku për të përfaqësuar këtë forcë politikë në garën për Prishtinën.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.