Mace digjitale që shkëmbehen për miliona dollarë! Mbërrin edhe loja e parë me kriptovalutë
Sikur të mos mjaftonte shkëmbimi i “bitcoin”, tashmë mbërrin edhe loja e bazuar në shitblerjen e disa maceve digjitale, pak a shumë në modelin e Pokemon. Në pak ditë “CryptoKitties” është transformuar në një mani të re në rrjet, në kufijtë e çmendurisë. E nisur vetëm disa javë më parë, loja e bazuar në “Ethereum”, ka akumuluar shkëmbime të mëdha për një kundërvlerë prej 8.5 milion dollarësh dhe një çmim mesatar për mace që shkon të rreth 25 dollarë, aq sa ka vendosur në krizë edhe vetë zinxhirin e Ethereum që nuk po arrin t’i mbështesë shkëmbimet; në disa momente është arritur në 10 mijë transaksione në pritje të certifikimit.
Macet e rralla
Mekanizmi është shumë i thjeshtë, e madje në kufijtë e mërzisë. Nuk mund të bësh tjetër veçse të blesh e të shesësh mace mes atyre që janë në treg ose t’i çiftosh që të kesh të reja. Macet e disponueshme që lëshohen në rrjet çdo 15 minuta me një çmim që aktualisht ka arritur në 8 ether, nuk janë të gjitha të ngjashme por ndryshojnë në disa detaje të veçanta. Disa specie janë shumë të rralla: për shembull janë 156 “jaguar”. Natyrisht sa më shumë të rralla të jenë macet aq më shumë do të kushtojnë.
Për të marrë pjesë në lojë duhet regjistrimi në sajtin “CryptoKitties”, por jo para se të kesh monedhat virtuale “ether’ për të blerë macet e nevojshme, duke i vendosur në një portofol digjital MetaMask. Më pas nis loja e blerjes dhe shitjes në një lloj burse virtuale të maceve digjitale.
Sigurisht duke pasur parasysh natyrën e lojës dhe të shumave që qarkullojnë, duhet pasur parasysh rreziku i madh i lojës që kthehet në një investim të vërtetë e që mund të bëhet vërtetë i kushtueshëm. Mbi të gjitha mund të rezultojë edhe si një zinxhir ku lojtarët e rinj rrezikojnë të humbasin gjithçka, duke parë se çmimet e maceve shumë të rralla po rriten gjithnjë e më shumë e në mënyrë të vrullshme, thuajse sa bitcoin.
Marrë nga Ilsole24ore/Përshtati në shqip:SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.