Macron, i “përzgjedhuri”- Fiton raundin e parë, Europa “vendoset” më 7 maj
Emmanuel Macron dhe Marine Le Pen do të jenë dy finalistët e garës përfundimtare të 7 Majit në Francë, duke konfirmuar atë që projektuan sondazhet. Nga Franca nuk erdhi asnjë surprizë.
Emmanuel Macron fitoi në raundin e parë të zgjedhjeve me 23.9% të votave, ndërkohë që Marine Le Pen e Frontit Nacional morri 21.4% të votave. Për herë të parë në historinë e republikave franceze, në raundin final nuk do të ketë asnjë prej kandidatëve të një prej dy partive tradicionale, ajo Republikane dhe ajo Socialiste.
Kandidati i Republikanëve, Francois Fillon, i cili u godit nga një skandal i gjerë në momentin që kryesonte garën, doli i treti në garë, me 19.9% të votave. Në vend të katërt u rendit Jena Luc Melenchon i ekstremit të majtë, me 19.6% të votave.
Benoit Hamon i socialistëve mori vetëm 6.3% të votave. Dueli mes Macron dhe Le Pen ndërkohë pritet të jetë mjaft interesant, pasi do të jenë përballë njëri tjetrit, dy kandidatë të cilët nuk ndajnë qoftë edhe një qëndrim të përbashkët, e ku ndahen së pari, sa i përket qasjes ndaj Europës.
Macron është një pro europianist i betuar, ndërkohë që Le Pen kërkon daljen e Francës nga Bashkimi Europian dhe Eurozona. Gjithsesi, duket se do të jetë pikërisht Emmanuel Macron pasardhësi i Francois Hollande, pasi veç sondazheve që flasin për një fitore dërrmuese të Macron, kandidatët tashmë të humbur të raundit të parë i kanë bërë thirrje votuesve të tyre që të mbështesin Macron. Duke filluar nga Francois Fillon, Jean Luc Melechon e deri të Benoit Hamon, të gjithë kanë kërkuar që votat të shkojnë për 39 vjecarin, ish-bankier.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.