Macron “përvesh mëngët” – Ofron ulje të tjera të taksave për të qetësuar protestat
Presidenti francez, Emmanuel Macron, premtoi këtë javë ulje të tjera tatimore, në përgjigje të protestave kundër-Qeverisë që kanë sfiduar autoritetin e tij. Në vitin e dytë të presidencës së tij, Macron ndodhet nën presion për të prezantuar politika që të qetësojë lëvizjen “jelekët e verdhë” që ka zgjatur prej 5 muajsh, ndërkohë që masa prej 10 miliardë euro e prezantuar në Dhjetor dështoi t’i qetësojë ata. Macron tha se kërkon një ulje të madhe të taksës ndaj të ardhurave, që do të financohet nga ulja e shpenzimeve qeveritare dhe nëpërmjet punëve të zgjatura të francezëve.
“Duket se përgjigja më e mirë nuk është mos rritja e taksave, por ulja e tyre për qytetarët, veçanërisht ata që janë të punësuar dhe pjesë e klasës së mesme. Unë nuk kërkoj rritje të taksave, unë dua ulje të taksave për ata që janë të punësuar, duke reduktuar tatimin ndaj të ardhurave.” –tha Macron.
Ai shtoi se kërkon që njerëzit të ndihen më të përfshirë në procesin demokratik duke thjeshtëzuar rregullat për referendumet. Përgjigja e ditës së Enjte është rezultat i një debati 3-mujor kombëtar. Megjithatë, Macron i qëndroi premtimeve për pjesën më të madhe të reformave që qeveria e tij ka zbatuar.
“Unë i bëra një pyetje vetes: A duhet të ndalojmë çdo gjë që kemi bërë në 2 vitet e shkuara? A bëmë kthesë të gabuar? Mendoj se është e kundërta. Mendoj se transformimet në vendin tonë nuk duhet të ndalojnë, pasi i përgjigjen kërkesave të qytetarëve” – tha Macron.
Rebelimi nisi fillimisht mbi planin për të rritur taksën e karburantit në Nëntorin e kaluar dhe devijoi në një protestë të gjerë kundër pabarazisë. Pavarësisht se numri i protestueseve ka rënë që prej kulmit të arritur në muajin nëntor, protestat kanë vazhduar për javën e 23-të radhazi.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.