Maji nxit pagesat jo cash – Transaksionet nëpër POS prekin rekordin e vitit, në rritje me 13%

Një prej treguesve më të rëndësishëm të tranzicionit drejt parasë elektronike, ai i pagesave nëpërmjet terminaleve POS, regjistron një rritje domethënëse gjatë muajit maj të këtij viti, si në terma transaksionesh, ashtu edhe në volum, tregojnë të dhënat më të fundit nga Banka e Shqipërisë. Kështu, shifrat zyrtare tregojnë se numri i transaksioneve nëpër terminalet POS gjatë majit ishte 642 mijë, nga 591 mijë që ishte në prill, në rritje me 8.6%, duke prekur nivelin më të lartë të këtij viti.

Edhe në terma volumi, rritja është e ndjeshme, në 2.83 mld lekë, nga 2.5 mld lekë që ishte gjatë muajit prill, në rritje me 13%. Edhe në këtë rast është prekur niveli më i lartë që prej fillimit të këtij viti. Ky tregues është i lidhur ngushtë edhe me fillimin e sezonit turistik, duke qenë se turistët, si vendas, si të huaj, kanë më shumë predispozitë për të evituar cashin dhe për të paguar me kartë. Por, duke qenë se maji nuk mund të konsiderohet si pjesë e sezonit turistik të verës, shifrat duken goxha optimiste, në një kohë që Shqipëria po bën përpjekje për të eleminuar sadopak pagesat cash, të cilat kanë një kosto mjaft të lartë për ekonominë.

Një tjetër tregues i tranzicionit drejt parasë elektronike, ai i transaksioneve nëpërmjet homebanking, flet gjithashtu për një rritje të ndjeshme në vlerë të këtyre transaksioneve gjatë majit.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.