Makinat në Tiranë-Durrës ndalin ‘fluturimin’! Por gjobiten edhe ata që ishin me 100 km/orë
Policia Rrugore e kryeqytetit njofton se po vijon kontrollin me aparatin e matjes së shpejtësisë në rrugët interurbane me rrisk për aksidente rrugore si Tiranë-Elbasan-Tiranë- Durrës-Tiranë, për të parandaluar aksidentet rrugore që vijnë si pasojë e shpejtësisë mbi normat e lejuara dhe në të gjitha rrugët e kryeqytetit me alkooltestues, për të evidentuar dhe ndëshkuar ata drejtues mjetesh që drejtojnë mjetin nën ndikimin e alkoolit apo më keq akoma në gjendje të dehur.
“Prej orës 20:00 të mbrëmjes e deri në 23:55 në rrugën interurbane Tiranë -Durrës-Tiranë ku shpejtësia e lejuar është 90km/h, janë konstatur 21 drejtues mjetesh të cilët qarkullonin me shpjetësi nga 100 km/h deri në 113 km/h, të cilët janë ndëshkuar me masa administrative nga 3.000 deri në 6.000 lekë të rinj dhe nuk është konstatuar asnjë drejtues mjeti që të qarkullonte me shpjetësi që cënojnë sigurinë e jetës në rrugë. Gjatë kontrolleve me alkooltestues janë evidentur gjatë mbrëmjes 4 drejtues mjetesh në gjendje të dehur dhe 11 të tjerë nën efektin alkoolit” njofton Policia.
Falë telefonatës së qytetarit tek salla e komandimit dhe drejtimit ne DVP Tiranë, se një automjet në rrugën e “Kavajes” i cili lëvizte drejt qendres duke kryer manovra të rrezikshme në rrugë, është parandaluar një ngjarje rrugore.
“ Patrulla e Policisë Rrugore ka ndaluar mjetin e raportuar nga qytetarët dhe pas kryeres së alkool testit rezultoi se drejtuesi i mjetit shtetasi 51 vjeçar ishte në gjendje të dehur në masën; testi i parë 1.13 mg/l, testi i dytë 1.14 mg/l, i cili u arrestua në flagrance” vijon njoftimi i Policisë.
Policia Rrugore apelon për të gjithë drejtuesit e mjeteve që të respektojnë sinjalistikën rrugore, mos të qarkullojnë me shpejtësi apo më keq akoma, edhe nën ndikimin e alkoolit apo në gjendje në të dehur, pasi shërbimet e Policisë Rrugore do jenë prezente në të gjitha akset rrugore dhe qendrat urbane në çdo orë të ditës dhe të natës, me qëllim evidentimin dhe ndëshkimin e shkelësëve të Kodit Rrugor, duke bërë të mundur rritjen e parametrave të sigurisë së jetës në rrugë.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.