Mallrat që favorizuan rritjen e eksporteve, çfarë eksportoi Shqipëria – Grupet me më shumë peshë dhe ato që po rriten më shumë
Rritja e eksporteve me rreth 3.5 miliardë lekë gjatë muajit Shtator u mbështet kryesisht mbi kontributin e grupeve të mallrave si “Tekstile dhe këpucë” dhe “Materiale ndërtimi dhe metale”. Grupi i parë shtoi dërgesat jashtë vendit me rreth 1.2 miliardë lekë, ndërsa i dyti me mbi 1 miliard lekë.
Edhe në terma vjetorë, për periudhën Janar-Shtator, këto grupe shënuan rritje me përkatësisht 7.3 miliardë lekë dhe 9.1 miliardë lekë.
Së bashku me mineralet e lëndët djegëse, pavarësisht uljes së eksporteve me 400 milionë lekë muajin e shkuar, këto grupe përbëjnë eksportet kryesore të Shqipërisë në tregjet ndërkombëtare.
Të marra së bashku ato zënë 18 nga 24 miliardë lekë eksporteve. Por, në terma relativë, janë sektorë të tjerë që po lulëzojnë në Shqipëri.
Kështu, grupi “Makineri, pajisje dhe pjesë këmbimi” rriti eksportet me 56,3% nga viti në vit, duke përmirësuar me gati 600 milionë lekë tregtinë dalëse.
Po ashtu në rritje të ndjeshme janë edhe eksportet që i takojnë grupit “Ushqime, pije, duhan”. Në Shtator 2017, ai shënoi rritje me 43,3%, ose me 664 milionë lekë.
Rritja në këto grupe mbështetet edhe nga të dhënat përgjatë 9 muajve të parë të vitit, ku “Ushqime, pije, duhan” ka shënuar 20% rritje me 3.4 miliardë lekë, ndërsa grupi “Makineri, pajisje dhe pjesë këmbimi” regjistroi një rritje me 31,2%, ose 2.5 miliardë lekë.
Megjithatë rritja më e madhe vjetore në përqindje i takon grupit “Materiale ndërtimi dhe metale” me 40%.
Vlen të theksohet se muajin e fundit, përveç mineraleve, lëndëve djegëse e energjisë, të gjithë mallrat e tjerë kanë rritur aktivitetin tregtar me jashtë. Ndër grupet me ndryshime më të vogla në terma absolutë, por në rritje me vetveten mund të përmendim edhe grupin “Prodhime druri dhe letre”, i cili është rritur me 25,3%.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.