Manastirliu: Brenda këtij viti do të bëhet rehabilitimi i 100 qendrave shëndetësore në mbarë vendin
Ministrja e Shëndetësisë dhe Mbrojtjes Sociale, Ogerta Manastirliu pa nga afër investimin e kryer në rehabilitimin e plotë të pikës së ambulancës Tufinë në bashkëpunim me Agjencinë Turke për Bashkëpunim dhe Koordinim (TIKA).
“Programi ynë i rehabilitimit të 300 qendrave shëndetësore po vijon në çdo komunitet, qendër dhe periferi, për të ofruar një standard të ri shërbimi në kujdesin parësor, edhe në bashkëpunim dhe me partnerët tanë, siç është rasti i ambulancës së Tufinës. Pjesë e këtij programi janë 100 qendra shëndetësore që do të rehabilitohen këtë vit” -tha Manastirliu.
Gjatë inspektimit, Manastirliu tha se bashkëpunimi me Agjencinë Turke do të vijojë me autoambulancat që do të përmirësojnë shërbimin e urgjencës. “Vijojmë jo vetëm investimin në infrastrukturë, por me Agjencinë Turke për Bashkëpunim, së shpejti pesë autoambulanca moderne do t’i shtohen shërbimit të urgjencës” – tha ministrja.
Sipas njoftimit, ambulanca Tufinë është një nga 7 pikat e ambulancave të Qendrës Shëndetësore Dajt, duke mbuluar me shërbim shëndetësor tashmë me një standard të ri, banorët e katër fshatrave: Tufinë, Tujan, Brrarë, Ferraj.
Njoftimi tha se 320 mijë banorë të Tiranës dhe rrethinave kanë përfituar shërbime më cilësore, me rehabilitimin e 17 qendrave shëndetësore të cilat janë përfshirë deri tani në programin e rikonstruksionit të 300 qendrave shëndetësore, nga të cilat 15 kanë përfunduar Gjithashtu, brenda muajit Maj përfundon edhe rikonstruksioni i dy qendrave shëndetësore Vorë dhe Sauk.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.