Manastirliu takon Yang–Vijon bashkëpunimi, aparatura të teknologjisë së lartë për trajtimin e tumoreve

Agjencia Ndërkombëtare e Energjisë Atomike do të vijojë bashkëpunimin me Shqipërinë në fushën e përmirësimit të kujdesit shëndetësor për diagnostikimin dhe trajtimin e tumoreve përmes aparaturave të teknologjisë së lartë.

Kjo ishte edhe një ndër çështjet kryesore për të cilën u ra dakord gjatë takimit të ministres së Shëndetësisë dhe Mbrojtjes Sociale, Ogerta Manastirliu me zëvendësdrejtorin e Përgjithshëm të (IAEA), Dazhu Yang në Vienë.

Ky i fundit e cilësoi vendin tonë si një rast suksesi për bashkëpunimin me Agjencinë, duke garantuar mbështetje të mëtejshme edhe përmes projekteve në trajnimin e stafit mjekësor.

Ndërkohë, ministrja Manastirliu vlerësoi asistencën e Agjencisë për bashkëfinancimin e akseleratorit të dytë linear të instaluar në Qendrën Spitalore Universitare “Nënë Tereza” si dhe për trajnimin e personelit mjekësor dhe teknik të Njësisë së Radioterapisë.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.