Mandati i anëtares së bordit të ERE – Kuvendi hap procedurën për zëvendësimin
Në mbështetje të detyrimit ligjor për të plotësuar vendet vakante në bordin e Entit Rregullator të Energjisë, Kuvendi ka nisur procedurat për zëvendësimin e anëtares Entela Shehaj.
Zonjës Shehaj i përfundon afati i emërimit në detyrë më datë 2 Dhjetor 2017, pasi është emëruar në këtë datë në vitin 2012, ndaj Kuvendi i Shqipërisë ka hapur zyrtarisht garën për paraqitjen e kandidatëve.
Personat e interesuar, krahas detyrimit për të qenë shtetas shqiptar duhet të plotësojnë kriteret e mëposhtme:
- duhet të kenë jo më pak se 10 vjet eksperiencë pune, prej të cilave të paktën 5 vjet duhet të jetë eksperiencë në sektorin energjetik
- duhet të jenë me profesion ekonomist
Lista me dokumentet e nevojshme që duhen paraqitur gjendet në njoftimin në faqen e Kuvendit, ndërsa aplikimet do të priten deri më datë 23 tetor.
Bordi i anëtarëve të ERE përbëhet nga 5 anëtarë, të cilët emërohen në detyrë nga institucioni i Kuvendit të Shqipërisë. Aktualisht ky bord përbëhet nga: Petrit Ahmeti, Adriatik Bego, Entela Shehaj, Abaz Aliko dhe Maksim Shuli.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.