Manipuluan të dhënat për pandeminë, arrestohen zyrtarët! Prokurorët kanë dyshime se kjo u bë që të shmangej futja në ‘zonë të kuqe’
Në Itali kanë nisur arrestimet për manipulimin e të dhënave mbi pandeminë. Institutit të Shëndetësisë i janë dërguar të dhëna të pasakta për numrin e të infektuarve, testimeve të kryera dhe nganjëherë edhe numrit të viktimave nga virusi Covid-19.
Ndaj karabinierët e Palermos dhe të Trapanit po zbatojnë masat e arrestit shtëpiak kundrejt disa anëtarëve të Departamentit Rajonal për Aktivitetet Shëndetësore dhe Observatorit Epidemiologjik DASOE në rajonin e Siçilisë.
Ansa raporton se në arrest shtëpie kanë përfunduar drejtuesi i përgjithshëm i Departamentit Rajonal për Aktivitetet Shëndetësore (DASOE) Maria Letizia Di Liberti, funksionarët e rajonit Salvatore Cusimano e punonjësi i një sipërmarrje që merret me menaxhimin informatik të të dhënave, Emilio Madonia.
Hetimi nisi kur u zbulua se në një laborator të Alcamos në Trapani, po jepeshin të dhëna false për dhjetëra tamponë.
Dyshimet e prokurorëve janë se modifikimi i të dhënave është bërë me qëllim që Siçilia të mos përfundonte si ‘zonë e kuqe’, e si rrjedhojë duhej të aplikonte masa më shtrënguese për qytetarët dhe ekonominë. Në hetim për këtë çështje janë edhe një serë funksionarësh lokalë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.