Maradona ndahet nga jeta në moshën 60-vjeçare. Bota e futbollit “qan” një nga më të mëdhenjtë e të gjitha kohërave
Diego Armando Maradona është ndarë nga jeta në mënyrë të papritur në moshën 60-vjeçare. Legjenda e futbollit u operua në tru në fillim të këtij muaji, ndërsa vijonte mjekimin në shtëpi. Sipas mediave argjentinase, Maradona pësoi arrest kardiak.
Mjekët që arritën në shtëpinë e tij pavarësisht përpjekjeve nuk mundën ta kthejnë në jetë. Diego Armando Maradona në 30 tetor festoi 60-vjetorin e lindjes, ndërsa pak ditë më pas iu nënshtrua ndërhyrjes në tru. Argjentinasi luajti për klubet më të mëdha si Boca Juniors, Napoli dhe Barcelona dhe u adhurua nga miliona tifozë në mbarë botën për aftësitë e tij të shkëlqyera.
Maradona, i konsideruar si një nga futbollistët më të mirë të të gjitha kohërave, fitoi Kupën e Botës me Argjentinën në vitin 1986, ku do të mbahet mend edhe për golin me dorë të shënuar kundër Anglisë.
Lidion Kulla / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.