Mario Draghi kryeministri i ardhshëm i Italisë?! Zyra e Presidentit Mattarella e mohon që të ketë pasur një takim mes tyre

Pas krizës politike që ka prodhuar dorëheqjen e kryeministrit Giuseppe Conte dhe përpjekjeve të këtij të fundit për një mandat tjetër si kryeministër, mediat italiane kanë raportuar rreth një takimi të presidentit Sergio Mattarella me ish drejtorin e Bankës Qendrore Europiane Mario Draghi.

Sipas raportimeve mediatike, synimi i këtij takimi ishte që Draghi të jetë kryeministri i ardhshëm i Italisë. Po zyra e presidentit Mattarella e ka përgënjeshtruar këtë lajm duke thënë se këto informacione janë të pabaza dhe se nuk ka pasur asnjë kontakt mes tyre që nga nisja e krizës. Referuar mediave italiane, është Matteo Renzi, shkaktari i krizës politike, ai që do të dëshironte që Draghi të ishte kryeministri i ardhshëm i Italisë.

Në fakt, përfshirja e Mario Draghit në politikë dhe mundësia që ai të jetë kryeministër i Italisë është artikuluar menjëherë sapo atij i ka përfunduar mandati në krye të institucionit më të rëndësishëm financiar europian.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.