Marrëdhëniet Kinë- Rusi, “periudha më e mirë në histori”
Lidhjet strategjike midis Rusisë dhe Kinës u vlerësuan mjaft entuziaste pasi presidenti kinez Xi Jinping përfundoi një vizitë dy-ditore në Rusi, me një marrëveshje së paku 10 miliardë dollarëshe.
XI, i cili u takua me Presidentin rus Vladimir Putin gjatë udhëtimit u tha mediave ruse se marrëdhëniet midis dy vendeve janë aktualisht në “kohën më të mirë të historisë së tyre”.
Presidenti kinez gjithashtu tha se Rusia dhe Kina ishin “partnerët më të besueshëm strategjikë të njëri-tjetrit”.
“Marrëdhëniet Kinë-Rusi duket se do të jenë më të qeta tani, por marrëdhëniet mes këtyre dy fuqive kanë pasur një histori të gjatë ulje – ngritjesh”, tha Ja Ian Chong, një profesor i asociuar në Universitetin Kombëtar të Singaporit, duke shtuar se ndryshimet në natyrën e kësaj marrëdhënieje mund të jenë të papritura dhe dramatike.
Një shtysë në bashkëpunimin diplomatik mund të jenë edhe zhvillimet në politikën e jashtme të SHBA.
“Fakti që SHBA duket shumë më pak sistematike në politikën e saj të jashtme në krahasim me të kaluarën krijon hapësirë për Kinën dhe Rusinë të përfitojnë nga kjo situatë dhe të bëjnë më të mirën”, tha Chong për CNBC.
Hugo Brennan, një analist, shtoi se qasja e Presidentit Donald Trump në politikën e jashtme ka më shumë gjasa të nxisë shtrirjen midis Pekinit dhe Moskës sesa të jetë një goditje midis të dyve.
Përveç përsëritjes së lidhjeve më të ngushta strategjike midis shteteve, çështje të tjera të diskutuara gjatë vizitës së Presidentit kinez, përfshinin thellimin e lidhjeve ekonomike dhe shqetësimet mbi sigurinë.
Edhe pse detajet rreth natyrës së saktë të përmirësimeve të propozuara në tregti dhe investime mbetën të paqarta, një fond investimi me vlerë 10 miliardë dollarë u njoftua gjatë udhëtimit, raportoi Financial Times.
Nënshkruar në marrëveshjen e së martës, fondet nga Fondi i Bashkëpunimit RMB të Rusisë dhe Kinës pritet të investohen në projektet e infrastrukturës të lidhura me iniciativën “One belt, One road” dhe bashkimin ekonomik euroaziatik, një bllok tregtar i përkrahur nga Putin.
Mediat shtetërore ruse thanë se fondi i investimeve ishte një marrëveshje midis Fondit të Investimeve të Huaja Direkte Ruse dhe Bankës Zhvillimore të Kinës.
Një tjetër marrëveshje me vlerë 6 miliardë juanë (882.35 milionë dollarë) u nënshkrua të martën, raportoi Reuters.
Fondet pritet të kanalizohen në fusha të tilla si zhvillimi i zinxhirit të inovacioneve.
Por pavarësisht deklaratave të miqësisë dhe asaj që Xi e quajti “miqësinë e tij të ngushtë” me Putinin, presioni vazhdon të ekzistojë në marrëdhëniet Kinë-Rusi, thanë ekspertët.
Kjo duket sidomos në iniciativën e OBOR të Kinës e cila përfshin pjesëmarrjen e disa vendeve të ish Bashkimit Sovjetik në Azinë Qendrore, përfshirë Kazakistanin, Taxhikistanin dhe Republikën e Kirgistanit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.