Marrëdhëniet Kosovë-Serbi – Rama, pozitiv ndaj qëndrimit publik të Vuçiç
Kryeministri, Edi Rama, ka bërë shënimin e ditës në rrjetin social Facebook. Duke pasur në konsideratë marrëdhëniet e “vështira” ndër vite mes Kosovës dhe Serbisë, kryeministri Rama ka dashur të ndajë me të gjithë lexuesit një shkrim të Presidentit serb, Aleksandër Vuçiç, i cili duket si një hap që mund të mundësojë dialog mes dy vendeve për njohjen e shtetit të Kosovës.
Ndër të tjera, Rama shkruan:“Ka ende shumë rrugë për të dalë nga tuneli i një historie të rëndë mizorish të përgjakshme, siç është historia e Ballkanit, ku vitet e fundit janë hedhur sidoqoftë drejt rrugëdaljes hapa që deri përpara këtyre viteve nuk i imagjinonin as më optimistët. Edhe ky shkrim i Aleksandër Vuçiçit, Presidentit të sapozgjedhur të Serbisë, nuk mund të imagjinohej pak vjet më parë paçka se, siç i thonē, djalli fshihet nē detaje dhe nga e thëna në të bërë është në mes një det i tërë… Dhe Kosova mbetet, siç e thotë edhe Presidenti serb, nyja gordiane, prerja ose jo e së cilës, përmes njohjes ose jo si shtet nga Serbia po shtoj unë, është edhe zgjedhja e qartë mes territ të tunelit dhe dritës së daljes prej tij! Por padyshim, kjo është një zgjedhje që e sjell në anën e dritë-daljes, përpjekja e mundimshme dhe reciproke për ta kuptuar deri në fund njëri-tjetrin, përmes një dialogu të palodhur e fort të dhimbshëm, në emër të dashurisë për kalamajtë e të dy popujve tanë dhe përgjegjësisë për të ardhmen me paqe e begati të dy kombeve tona.”
Me tej Rama është shprehur se shijen e mirë që i ka lënë ky meditim publik i Presidentit të Serbisë, e ka dashur që ta ndajë me ndjekësit e tij.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.