Marrëdhëniet Shqipëri-Çeki – Bartl: Ka vend për përmirësim, ju mbështesim për integrimin
Zëvendësministri çek i Ekonomisë, Vladimir Bartl, shprehet se marrëdhëniet ekonomike dhe politike mes Shqipërisë dhe Republikës Çeke janë mjaft të mira, por ka shumë hapësira për të thelluar këtë bashkëpunim, sidomos në sektorët që cilësohet prioritarë nga të dyja palët. I ftuar në studion e Televizionit SCAN, zëvëndësministri çek deklaroi se, sektorët ku investitorët çekë janë të konsoliduar janë: industria, përpunimi i ushqimeve, manifaktura, energjia, etj.
“Marrëdhëniet politike janë të jashtëzakonshme. Nuk shoh asnjë shqetësim në marrëdhëniet bilaterale dhe besoj se ne kemi gjithashtu disa hapësira për të përmirësuar, sidomos në nivelin ekonomik, ku ne jemi të interesuar janë ato ku Republika Çeke është e fuqishme. Pra industria përfundimtare, procesimi ushqimore, industria e manifakturës, energjia, minierat dhe industria nxjerrëse dhe gjithashtu strukturat mjedisore.”
Sipas Bartl, klima e të bërit biznes në Shqipëri është përmirësuar ndjeshëm, por ka vend për përmirësim të mëtejshëm. Ai konfirmoi edhe mbështetjet e Republikës Çeke për hapjen e negociatave për integrim mes Shqipërisë dhe Bashkimin Europian.
“Me sa kuptoj unë, klima e biznesit në Shqipëri është përmirësuar ndjeshëm, por ajo që mund të lexoni sidomos në raportimet nga Komisionit Europian ka ende disa sfera për përmirësime, sidomos në fushën e sundimit të ligjit. Republika Çeke është tradicionalisht mbështetëse e anëtarësimit të vendeve të Ballkanit në Bashkimin Europian dhe ne do të vazhdojmë ta bëjmë këtë. Ne do ta ruajmë këtë politikë.”
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.