Marrëveshja $110 mld e armëve – Vizita e Trump në Arabinë Saudite rrit aksionet e kompanive të mbrojtjes
Aksionet e kompanive të mbrojtjes e mbyllën sesionin e parë të javës në performancë të fortë, pasi Presidenti amerikan Donald Trump nënshkroi një marrëveshje të armëve prej rreth 110 miliardë dollarë me Arabinë Saudite.
Marrëveshja do të arrijë një vlerë prej 350 miliardë në 10 vite. Aksionet e Lockheed Martin dhe General Dynamics u rritën sipër 1%-shit. Këto, së bashku me Raytheon dhe Northrop Grunmann, arritën nivele rekord të larta gjatë sesionit të parë të tregtisë në Shtetet e Bashkuara.
Edhe fondet e listuar në bursë që ndjekin performancën e këtyre komapnive, kanë pasur një rritje sipër 1%-shit. Prodhuesi i avionëve Boeing, nënshkroi gjithashtu një serë marrëveshjesh me Arabinë Saudite gjatë vizitës së Donald Trump në fundjavë, përfshirë këtu shitjen e avionëve ushtarakë dhe për pasagjerë.
Këto lloj marrëveshjesh mbi armët, kanë rritur edhe në të shkuarën vlerën në treg të kompanive të mbrojtjes. Analistët thonë se duke marrë parasysh periudhën e zgjatur të finalizimit të këtyre kontratave, ndikimi në rezultatin financiar të 2017-ës te kompanitë do të jetë i vogël.
Lockheed Martin pritet të jetë fituesi më i madh nga kjo marrëveshje. Marrëveshja e Trump me Arabinë Saudite, fuqizon aleancën me vendin më të madh eksportues të naftës në botë dhe do të vlejë 350 miliardë dollarë në 10 vite.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.