Marrëveshja e Brexit dështon sërish – Po tani çfarë?

Marrëveshja e Brexit, propozuar nga kryeministrja, Theresa May, dështon për të dytën herë. Ligjbërësit e Mbretërisë së Bashkuar refuzuan marrëveshjen me 149 vota. Së shpejti pritet përgjigja nëse Mbretëria e Bashkuar duhet të largohet nga blloku 28 – anëtarësh pa marrëveshje, apo do të shtyhet procesi, i cili është planifikuar me 29 mars.

Çfarë ndodh tani?

Siç është premtuar paraprakisht nga Theresa May, hapi tjetër do të jenë tentativat në ditë të njëpasnjëshme për të parë nëse deputetët duan të përjashtojnë mundësinë e një largimi pa marrëveshje, e nëse po, a duan të zgjerojnë nenin 50 dhe të vonojnë procesin e Brexit.

“Mund të theksoj se votimi i së mërkurës nuk përjashtoi përgjithnjë mundësitë për marrëveshje, vetëm për tani. Dhe nëse deputetët refuzojnë të përjashtojnë çdo marrëveshje, atëherë do të bëhet politika zyrtare e qeverisë.” tha kryeministrja May.

Çfarë do të thotë kjo për Theresa May?

Kishte spekulime se May mund të jepte dorëheqjen nëse do të humbiste përsëri. Dhe pse nuk e ka bërë, dështimet e njëpasnjëshme e kanë dobësuar në rol. Tani për tani, fokusi i deputetëve është formësimi i Brexit, dhe shumë pak do të donin të ishin në pozitën e vështirë aktuale të kryeministres. Por, si me gjithçka tjetër të kësaj çështjeje – ngjarjet mund të lëvizin shumë shpejt.

Sa mund të vonohet Brexit?

Kjo varet nga mbështetja e deputetëve. Kryeministrja May është e bindur se nëse do merret një pauzë, duhet të jetë e shkurtër dhe jo një që do të kërkonte që Mbretëria e Bashkuar të merrte pjesë në zgjedhjet e ardhshme europiane, duke u zhvilluar në 10 javë.

Mund të ketë një Brexit më të butë?

Me sa duket jo, të paktën jo ende. Pas votimit, zëdhënësi i kryeministres përsëriti kundërshtimin e saj për çdo marrëveshje të Brexit që përfshin një bashkim doganor. Ndërkohë, Bashkimi Europian nuk duket fort entuziast për bisedime të mëtejshme.

A mund të ketë zgjedhje të përgjithshme?

Kjo është ajo që konservatorët besnikë të kryeministres kanë  parashikuar në rast se do kishte një humbje të dytë. Megjithatë, zgjedhje mund të ndodhin akoma, por kjo do të përfshinte zgjerimin e nenit 50, gjë të cilën qeveria nuk e dëshiron.

Burimi: The Guardian

J.V/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.