Marrëveshja në Kuvend/ Si do të negociohet me amerikanen Bechtel për ndërtimin e Hidrocentralit të Skavicës. Kontrata në dy faza
Këshilli i Ministrave ka depozituar në Kuvend projektligjin për procedurën e veçantë të negociimit dhe ekzekutimit të kontratës me partnerin strategjik “Bechtel Internacional”, Inc., për projektimin dhe ndërtimin e hidrocentralit të Skavicës bazuar në shprehjen e interesit paraprak të depozituar në Ministrinë e Infrastrukturës dhe Energjisë.
“Palët shprehin interesin e tyre për bashkëpunim në fushat e projektimit, ndërtimit dhe sigurimit të financimit për realizimin e projektit në zonën e Dibrës. Kontrata e fazës së parë dhe kontrata e fazës së dytë do të nënshkruhen nga Korporata Elektroenergjetike Shqiptare në cilësinë e autoritetit kontraktues ndërkohë që Ministria e Infrastrukturës dhe Energjisë do asistojë gjithë procesin.
Procedura e negociimit për finalizimin e kontratës së fazës së parë do të zhvillohet nga Korporata Elektroenergjitike Shqiptare dhe do të fillojë brenda 5 ditëve nga dita kur shoqëria “Bechtel” do të dorëzojë pranë Korporatës Elektroenergjitike Shqiptare propozimin zyrtar lidhur me kontratën e fazës së parë.
Procedura e negociimit për fazën e dytë të kontratës do të zhvillohet nga Komisioni i Negociimit i krijuar me vendim të Këshillit të Ministrave me përfaqësues të Korporatës Elektroenergjitike Shqiptare, Ministrisë së Infrastrukturës dhe Energjisë dhe nga ministri të tjera të linjës ose organe të tjera sipas përcaktimit në këtë vendim” shkruhet në relacionin e nismës.
Kontrata do të ndahet në dy faza:
a) kontrata e fazës së parë, e cila do të përfshijë aktivitetet paraprake të punës që do t’i mundësojnë Bechtel të paraqesë një propozim tek Autoriteti Kontraktues për kontratën e fazës së dytë dhe të ndihmojë këtë të fundit dhe qeverinë shqiptare në sigurimin e mbështetjes financiare për projektin, dhe
b) kontrata e fazës së dytë që konsiston në projektimin dhe ndërtimin e hidrocentralit të Skavicës.
Kontrata e fazës së parë dhe kontrata e fazës së dytë do të nënshkruhen nga Korporata Elektroenergjetike Shqiptare në cilësinë e autoritetit kontraktues. Procedura e negociimit për fazën e dytë të kontratës do të zhvillohet nga Komisioni i Negociimit i krijuar me vendim të Këshillit të Ministrave me përfaqësues të Korporatës Elektroenergjitike Shqiptare, Ministrisë së Infrastrukturës dhe Energjisë dhe nga ministri të tjera të linjës ose organe të tjera sipas përcaktimit në këtë vendim.
Komisioni i Negociimit do të fillojë punë menjëherë pas hyrjes në fuqi të vendimit të Këshillit të Ministrave për krijimin e tij, vendim ky i cili do të përcaktojë anëtarësinë e Komisionit, kompetencat, objektin e punës dhe procedurën e vendimmarrjes. Komisioni i Negociimit të kontratës mund të asistohet nga një konsulent, i përzgjedhur nga Avokatura e Shtetit, sipas procedurave të përcaktuara për këtë qëllim për Avokaturën e Shtetit. Ministria e Infrastrukturës dhe Energjisë do asistojë gjithë procesin.
Autoriteti kontraktues dhe Bechtel do të nënshkruajnë kontratën e fazës së parë brenda 3 ditësh pune nga data e finalizimit të kushteve të saj. Kontrata e fazës së dytë do të nënshkruhet nga autoriteti kontraktues brenda 3 ditësh pune nga data e finalizimit të kushteve të saj nga Komisionin i Negociimit. Ministria e Infrastrukturës dhe Energjisë do t’i paraqesë për miratim Këshillit të Ministrave kontratën e nënshkruar në lidhje me fazën e parë të projektit brenda 3 ditësh pune nga nënshkrimi i saj. Data e hyrjes në fuqi të kontratës për fazën e parë të projektit do të jetë data e hyrjes në fuqi të vendimit të Këshillit të Ministrave që miraton kontratën.
Ky projektligj në këtë fazë nuk sjell efekte financiare shtesë për buxhetin e shtetit. Nga zbatimi i tij do mundësohet, ndër të tjera, përcaktimi i kostove financiare për realizimin e HEC Skavica dhe gjetja e fondeve të nevojshme për implementimin e tij.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.