Marrëveshje kundër korrupsionit, Gjonaj: Plan veprimi 2018-2020, së shpejti institucionet e reja
Lufta kundër korrupsionit ka qenë në qendër të vëmendjes së takimit mes Ministres së Drejtësisë Etilda Gjonaj dhe Kreut të Agjencisë italiane të Antikorrupsionit Raffaele Cantone.
Në një dalje të përbashkët para shtypi Gjonaj tha se bashkë me partnerët italianë po punohet për një strategji të përbashkët në këtë drejtim, ndërkohë që së shpejti do të ngrihen institucionet shqiptare që do ashpërsojnë luftën kundër korrupsionit.
Cantone tha se Shqipëria ka hedhur hapa pozitive në luftën kundër korrupsionit dhe se është i nevojshëm koordinimi i mëtejshëm i masave për rritjen e rezultateve.
“Shqipëria po bën hapa pozitivë nga ana legjislative. Italia do ndihmojë Shqipërinë në luftën kundër korrupsionit. Duhen krijuar mekanizma koordinimi nga autoritetet e krijuara për të luftuar korrupsionin. Ne mund t’i japim një mbështetje Shqipërisë për forcimin e këtyre kompetencave. Për t’i bërë të mundur Shqipërisë të zbatojë një politikë antikorrupsion. Besoj se shumë shpejt do të kemi një marrëveshje për të realizuar bashkëpunimin për të cilin folëm më herët”
Kreu i Agjencisë Italiane të Antikorrupsionit po zhvillon një vizitë në Shqipëri, ku do të takojë përfaqësuesit e disa institucioneve të rëndësishme në vend.
L.R/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.