Marrëveshje për energjinë Kosovë-Serbi/ Serbët e 4 komunave do të paguajnë energjinë e konsumuar. Nuk ndodhte prej 2 dekadash

Kosova dhe Serbia kanë nënshkruar të martën në Bruksel marrëveshjen për energjinë. Njoftimi është dhënë përmes një postimi në Twitter nga i dërguari i posaçëm i BE-së, për dialogun Kosovë-Serbi, Miroslav Lajçak.

“Me kënaqësi ju njoftoj se Kosova dhe Serbia sapo miratuan udhërrëfyesin për zbatimin e marrëveshjeve për energjinë në kuadër të dialogut të lehtësuar nga BE-ja. Ky është një hap i madh përpara”, ka shkruar Lajçak.

Edhe kryenegociatori i Kosovës në dialog, Besnik Bislimi, gjithashtu ka konfirmuar arritjen e marrëveshjes duke nënvizuar se marrëveshja “mundëson faturimin e energjisë elektrike në katër komunat veriore të Kosovës, sipas ligjeve dhe sistemit rregullativ të Kosovës”.

Kjo është marrëveshja e parë e arritur në kuadër të dialogut Kosovë-Serbi që kur Miroslav Lajçak po udhëheq këtë proces.

Qytetarët e komunave të Mitrovicës së Veriut, Leposaviqit, Zveçanit dhe Zubin Potokut, kryesisht serbë, nuk paguajnë prej më shumë se dy dekadash për energjinë e konsumuar. Që nga kriza e shtatorit në veri të Kosovës, kryenegociatorët, Besnik Bislimi nga Prishtina dhe Petar Petkoviç nga Beogradi janë takuar vetëm një herë, më 21 prill, kur dështoi arritja e marrëveshjes për targat e automjeteve.

Dialogu në nivel të kryenegociatorëve është zhvilluar disa herë para dhe pas këtij momenti por pa takimin e drejtpërdrejtë të tyre. Secili takim i zhvilluar në Bruksel që nga ajo kohë ka përfunduar pa asnjë rezultat.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.